2021 jylǵy 21-28 aqpan jáne 28 aqpan men 7 naýryz aralyǵynda Nur-Sultan qalasynda ATP Challenger Tour serııasynyń «FORTE CHALLENGER 100» jáne «FORTE CHALLENGER 125» halyqaralyq týrnırleri ótedi. Jarystyń jalpy júlde qory 260 400 AQSh dollaryn quraıdy, dep habarlaıdy Egemen.kz QTF resmı saıtyna silteme jasap.
Bedeldi jarysqa álemdik reıtıngtiń úzdik júzdigine engen oıynshylar qatysady. Qazaqstan namysyn Mıhaıl Kýkýshkın, Dmıtrıı Popko, Aleksandr Nedovesov, Denıs Evseev, Tımofeı Skatov, Grıgorıı Lomakın jáne basqalar qorǵaıdy.
«Qazaqstan astanasy iri jarystar qabyldaıdy. Búkil álemde koronavırýstyq pandemııaǵa baılanysty kestedegi matchtardyń basym bóligi toqtatylǵandyqtan, Kásipqoı tennısshiler qaýymdastyǵy Qazaqstan tennıs federasııasynan birden eki týrnır ótkizýdi surady. Bul serııa Avstralııa ashyq chempıonatynda óz ónerin aıaqtaǵan oıynshylar úshin birden eki úlken týrnırge daıyndalýǵa jáne qatysýǵa tamasha múmkindik. Biz Qazaqstan quramasynyń barlyq músheleri qatysady dep kútýdemiz. Sportshylarymyz upaı alýǵa, reıtıngtegi óz pozısııalaryn jaqsartýǵa berilgen múmkindikti jibermeý kerek, eń aldymen bul olımpıada joldamasyn ıelený úshin de mańyzdy. Biz buǵan deıin «chellendjer» sanatyndaǵy jarystar ótkizgen joqpyz, bul oıyndarda 100 jáne 125 upaı oınatylady. Joǵary deńgeıdegi týrnır bolǵandyqtan, eki jarysqa da myqty oıynshylardyń kelýin kútemiz – jarysqa tirkelgen sportshylardyń esimderi sózimizge dálel», - dep atap ótti Qazaqstan tennıs federasııasynyń vıse-prezıdenti Iýrıı Polskıı.
Týrnırdi ótkizý kezinde sanıtarlyq-epıdemıologııalyq qaýipsizdiktiń joǵary sharalary eskerilip, oıyndar kórermendersiz jáne qatań hattama aıasynda ótedi. Qatań saqtalýy tıis erejege baılanysty sportshylar ekskýrsııaǵa, murajaılarǵa baryp, qala boıynsha serýendeı almaıdy.