Shymkent qalasy jumyspen qamtý jáne áleýmettik qorǵaý basqarmasyna qarasty «Halyqqa áleýmettik qyzmet kórsetetin qalalyq aýmaqtyq ortalyǵy» – jartylaı stasıonarlyq qyzmet kórsetetin mekeme. Búginde bólimshede 76 balaǵa arnaýly qyzmet túrleri kórsetilýde. Onyń ishinde 62 balanyń tirek-qımyl júıesi buzylǵan. Osyndaı múmkindigi shekteýli balalar úshin ortalyqta tuz shahtasy iske qosyldy.
– Bul emdeý ádisi ımmýnıtteti kúsheıtip, tynys alý júıesin, ókpeniń jeldetilýin jaqsartady. Bronh aýrýyn emdeýge jáne sýyq tıgen jaǵdaıda da járdemi bolady. Al arnaıy tuz bólmesiniń erekshe jabdyqtalýy adamnyń ortalyq júıke júıesindegi tejelý prosesterin qalpyna keltirýge yqpal etedi. Bólmeniń shamadan tys belsendi, mazasyz balalardy tynyshtandyratyn da áseri bar, –deıdi ortalyq dırektory Zamıra Ábildaeva.
Sondaı-aq, ortalyqtaǵy balalarǵa bıyldan bastap dárigerler nusqaýymen ottegi kokteıli (kıslorodnyı kokteıl) berile bastady. Bul aǵzany qajetti mólsherde ottegimen qanyqtyryp, júrek-qan tamyrlary men tynys alý júıelerine jaqsy áser etedi. Sondaı-aq ish qatýyn aldyn-alyp, as qorytý joldarynyń jaqsarýyna yqpaly zor. Dárigerlerdiń aıtýynsha, ottegi kokteıli aǵzanyń qorǵanysh qasıetterin, stresske tózimdiligin arttyryp, densaýlyqty jaqsartady.
Ortalyqtaǵy mamandar erekshe kútimdi qajet etetin balalardyń qımyl-qozǵalysyn jaqsartý úshin kúndelikti ońaltý, jattyǵý sabaqtaryn uıymdastyrady. Mundaı jattyǵýlar kezinde vertıkalızatorlar men kópfýnksıonaldy oryndyqtar da tıimdi qoldanylady.