Álemdi jaılaǵan pandemııanyń saldarynan týyndaǵan qarjylaı qıyndyqtarǵa baılanysty Túrkııada kóptegen qonaqúı ıesi óz kásibin satýǵa bel býǵan, dep habarlaıdy Egemen.kz
Túrkııadaǵy tanymal satý saıtynyń (Sahibinden.co) málimetinshe, sońǵy aıda Antalıada 234 qonaqúı satylymǵa shyǵarylǵan: Muratpashada – 56, Alanıada – 42, Kemerde – 39, Manavgatta – 33. Sondaı-aq Kashta – 21, Konıaaltyda – 16, Serıkte – 13, Kýmlýdjede – segiz, Kepezde – úsh jáne Fınıkete, Gazıpashede jáne Demrede bir týrıstik aımaqtan satylymǵa shyǵarylǵan.
Satýǵa qoıylǵan eń qymbat nysannyń quny 585 mıllıon túrik lırasyna (shamamen 35 mıllıard teńge) baǵalanǵan. Konakly aýdanynda ornalasqan bes juldyzdy qonaq úıde 330 bólme bar, bir ýaqytta myńǵa jýyq qonaq tura alady.Eń arzan nysan 5 mıllıon 200 myń túrik lırasy (shamamen 319 mıllıon teńge) somasyna baǵalandy.
Alanıa týrıstik operatorlar qaýymdastyǵynyń (ALTID) jáne Alanıany damytý jáne týrızm qorynyń (ALTAV) vıse-prezıdenti Mehmet Dahaoglýdyń aıtýynsha, qonaqúıler buryndary da satylǵan, biraq munsha kólemde emes.
– Jerorta teńizi aımaǵynda kóptegen týrıstik nysandardyń satylýynyń basty sebepteriniń biri pandemııadan týyndaǵan ekonomıkalyq quldyraý boldy. Aqsha tabatyn, jumyspen qamtamasyz etetin jáne el úshin tabys bolatyn kásipti kim satqysy keledi? – dedi Mehmet Dahaoglý.
Eske salaıyq, 2020 jyly pandemııaǵa baılanysty týrıstik aǵyn 80 paıyzǵa tómendegen kezde túrik qonaqúıleri qarjylyq qıyndyqtarǵa tap boldy. Túrkııa qonaqúı federasııasynyń (TUROFED) baǵalaýynsha, 2021 jyly Túrkııada demalýǵa 25-ten 30 mıllıonǵa deıin halyqaralyq týrıster kelýi múmkin. Al 2019 jyly Túrkııaǵa 50 mıllıonǵa jýyq saıahatshy barǵan.