Premer-mınıstr Oljas Bektenov týrızm jáne sport mınıstri, Almaty oblysy men Almaty qalasy ákimderi, sondaı-aq Almaty Superski jobasyn júzege asyrýǵa jaýapty Kazakh Tourism Development Ltd basshylyǵynyń qatysýymen Almaty taý klasterin (ATK) damytý máseleleri boıynsha keńes ótkizdi, dep habarlaıdy Egemen.kz.
Premer-mınıstr josparlanǵan is-sharalardyń oryndalý barysy, jobalardyń aǵymdaǵy mártebesi jáne ATK damytý jónindegi aldaǵy qadamdar týraly baıandamalardy tyńdady.
Almaty taý klasterin damytýdyń keshendi jospary 73 is-sharany qamtıdy, onyń 49-yn bıyl júzege asyrý josparlaǵan. Birinshi kezeńde Shymbulaqty jańǵyrtý jáne Býtakovka, Kimasar shatqaldary aımaqtaryn damytý kózdelgen. Ekinshi kezeń 2027 jyly bastalady jáne Pıoner, Oi-Qaragai kýrorttaryn damytýdy, sondaı-aq olardy aspaly jol júıesi arqyly biriktirýdi qamtıdy.
Kazakh Tourism Development Ltd atqarýshy dırektory Erjan Erkinbaev Almaty Superski tujyrymdamasynda jaıaý serýendeýshilerdiń keshendi ınfraqurylymyn, zamanaýı vızıt-ortalyqtaryn jáne soqpaqtar men marshrýt belgilerinen bastap bıik taýly aımaqtardaǵy shuǵyl baılanysqa, sıfrlyq navıgasııaǵa jáne kúrdeliligi ártúrli deńgeıdegi marshrýttar katalogterine deıin biryńǵaı qaýipsizdik júıesin qurýǵa erekshe mán beriletinin baıandady. Jobanyń ereksheligi Shymbulaq, Almaty Superski kýrorttaryna jáne basqa da keleshegi zor baǵyttarǵa aspaly joldardyń negizgi kólik toraby bolatyn biryńǵaı vokzal bolady.
Kóshi-qon saıasaty ózgeredi: Oljas Bektenov mınıstrlerge naqty mindetter júktedi
Qala ákimi Darhan Satybaldy Almaty qalasynyń ákimdigi atqaryp jatqan jumystar týraly baıandady. Shymbulaqty jańǵyrtý aıasynda bıyl mamyr aıynda jeti aspaly kópirdiń alǵashqysynyń qurylysy bastalady. Jyl sońyna deıin eki jańa jelini aıaqtaý josparlanýda, oǵan 5 shaqyrymnan astam trassany qosylady (qazirgi jalpy uzyndyǵy – 18 km). Sondaı-aq Shymbulaqta 2 aspaly jol jańǵyrtylady.
Almaty Superski jobasy qazir ınjenerlik ınfraqurylym daıyndap, jabdyqtar satyp alýda. Bıyl 8 kópir men sý ótkizý qurylystaryn salý kózdelgen. Bıylǵy maýsym aıynda uzyndyǵy 6 shaqyrym avtojol qurylysyn bastaý josparlanyp otyr. Gazben jabdyqtaý jáne káriz jelileri 2027 jyly jolmen bir mezgilde salynady. Jalpy, qala ákimdiginiń málimdeýinshe, ınjenerlik ınfraqurylym men avtojol 2027 jyldyń qyrkúıegine deıin aıaqtalady dep kútilýde.
Almaty oblysynyń ákimi Marat Sultanǵazıev 2025-2029 jyldarǵa arnalǵan keshendi jospar sheńberinde óńirde 92,8 mlrd teńge bolatyn 15 is-shara kózdelgenin, onyń 83,8 mlrd teńgesi jeke ınvestısııalar ekenin baıandady. Oi-Qaragai kýrortynda búginde birqatar jumystar oryndaldy, sonyń ishinde 10 oryndyq gondola jáne 6 oryndyq aspaly jol, shańǵy trassalarynyń birinshi kezeńi, paraglaıdıng alańy jáne basqa da nysandar paıdalanýǵa berildi. 2027 jyldyń III toqsanynda kýrortty qosymsha elektrmen jabdyqtaý jobasy aıaqtalady dep kútilýde. Sondaı-aq, «Taý-Turan – Baıbulaq» avtomobıl jolyn kúrdeli jóndeý josparlanýda.
Premer-mınıstr jaýapty memlekettik organdar men uıymdar tarapynan jumys qarqyny baıaý ekenin aıtty. Almaty taý klasteri men Almaty Superski kýrortynyń damýy erekshe baqylaýda ekeni atap ótildi.
«Almaty taý klasteri men Almaty Superski kýrortyn damytý – ekonomıka úshin týrıster aǵynyn ulǵaıtýǵa jáne ınvestorlardy tartýǵa tikeleı yqpal etetin mańyzdy jobalar. Olardy júzege asyrý negizsiz sozylyp bara jatyr. Memlekettik organdar bul jumysqa tolyq kirisken joq. Barlyq máseleni jedel jáne birlesip sheshińizder», dedi Oljas Bektenov.
Premer-mınıstr birqatar tapsyrma berdi. Olar – ATK jáne Almaty Superski jobalary boıynsha memlekettik saraptama qorytyndylaryn ýaqytynda berý; jobalardy ǵylymı súıemeldeý; arnaıy jáne órt sóndirý tehnıkalarynyń ótýi úshin qosymsha ýchaskeler bólý jóninde sharalar qabyldaý; Almaty Superski kýrortynyń nysandaryn salýdy bastaý úshin ýaqytsha ınfraqurylym (joldar, ınjenerlik jeliler jáne t.b.) júrgizý jáne qajetti kelisimder berýdi qamtamasyz etý.
Jalpy, Almaty taý klasterin jáne Almaty Superski jobasyn damytý zamanaýı jáne qoljetimdi taý ınfraqurylymyn keńeıtýge, buqaralyq jáne kásibı sportty tanymal etýge, sondaı-aq jyl boıǵy demalysty yntalandyrýǵa baǵyttalǵan. Almaty Superski jobasy óńir ekonomıkasy úshin jańa ósý núktesine aınalýǵa, myńdaǵan jumys oryndaryn qurýǵa, týrıstik aǵyndy ulǵaıtýǵa, Qazaqstannyń taý týrızminiń halyqaralyq kartasyndaǵy pozısııasyn nyǵaıtýǵa jáne Almatynyń Ortalyq Azııanyń zamanaýı týrıstik ortalyǵy retinde damýyna jańa serpin berýge qabiletti.
Sharýalarǵa túsetin qarjylyq júktemeni azaıtý: Bektenov Úkimet qaýlysyna tıisti ózgerister engizýdi tapsyrdy
Tujyrymdamanyń mańyzdy bóligi balalar men jasóspirimderdi qysqy sport túrlerimen, belsendi ómir saltymen jáne taýda qaýipsizdikti saqtaý mádenıetimen tanystyrý úshin mektep jáne bilim berý baǵdarlamalaryn iske qosý bolmaq. Kadrlardy daıarlaý maqsatynda taý shańǵysy mamandyqtary boıynsha 350-ge jýyq grant bólý josparlanýda. Kolledjder aspaly jol ınjenerlerin, kótergish mehanıkterdi, trassalar men qar ınjenerlerin, qar zeńbirekteri, qar kóshkini jáne taǵy da basqalar boıynsha mamandar daıarlaýdy bastaıdy.
Jumystardyń jekelegen bir baǵyty – salalyq ǵylymı ınstıtýttarmen jáne saraptamalyq uıymdarmen yntymaqtastyq ornatý. Joba sheńberinde ekologııa, zoologııa, topyraqtaný, geologııa, gıdrologııa salasyndaǵy mamandarmen ózara is-qımyl júrgiziledi. Mundaı tásil jobany zamanaýı ǵylymı derekter, halyqaralyq qaýipsizdik standarttary jáne tabıǵı ortaǵa uqypty qaraý qaǵıdattary negizinde júzege asyrýdy qamtamasyz etedi.
Oljas Bektenov: Shaǵyn avıasııanyń áýe kemelerin satyp alý isinde kemshilikter bar
Týrızm jáne sport mınıstrliginiń derekteri boıynsha, jobalardy júzege asyrý jyl boıǵy týrıstik aǵymdy 2 mln-nan 5 mln adamǵa deıin ulǵaıtýǵa múmkindik beredi. Bul aımaq pen jalpy elimiz úshin eleýli áleýmettik-ekonomıkalyq tıimdilikti qamtamasyz etedi.