Sıfrlyq damý, ınnovasııalar jáne aeroǵarysh ónerkásibi mınıstrligi derbes derekterdi qorǵaýdy kúsheıtý jónindegi zań jobasyna usynystar qabyldaıdy, dep habarlaıdy Egemen.kz.
Memleket basshysynyń tapsyrmasyn oryndaý maqsatynda mınıstrlik derbes derekter salasyn jetildirýge jáne olardy qorǵaýǵa baǵyttalǵan zańnamaǵa túzetýler ázirleýdi bastady.
Sıfrlyq servıster qazaqstandyqtardyń ómirine jıi qoldanysqa enýde, sonymen qatar derbes derekterdiń taralyp ketý táýekeli de artyp keledi. Qazirgi zamanǵy shyndyqtaǵy derbes derekterdiń qaýipsizdigi máseleleri bizdiń elimiz úshin basym máselelerdiń biri bolyp tabylady.
Osyǵan baılanysty árbir qazaqstandyq derbes derekterdi qorǵaýdy kúsheıtý, jeke derekterge qatysty óz quqyqtaryn keńeıtý jáne osy saladaǵy ulttyq zańnamany jaqsartý boıynsha óz usynystaryn engize alady.
Usynystar 2021 jylǵy 15 naýryzǵa deıin tómendegi tásildermen qabyldanady:
- «Elektrondyq úkimet» portalynda elektrondyq túrde;
- kib@mdai.gov.kz elektrondyq poshta;
- poshta arqyly myna mekenjaıǵa: 010000, Nur-Sultan qalasy, Máńgilik El dańǵyly, 8, Mınıstrlikter úıi, 2-kireberis.
Jınalǵan usynystar biryńǵaı zań jobasynda qalyptastyrylady, óz kezeginde jurtshylyqpen talqylaýǵa shyǵarylatyn bolady.
Mazmuny boıynsha usynystar negizdi ári dáleldi bolýǵa, sondaı-aq Konstıtýsııamen kepildik berilgen adam quqyqtary men bostandyqtaryn buzbaýǵa tıis ekenin atap ótken jón.