Keshe fýtboldan ÝEFA Chempıondar lıgasynyń 1/8 fınal oıyndarynyń taǵy eki matchy ótti. Portýgalııanyń «Portý» klýby óz alańynda «Iýventýsti» jeńse, «Sevılıa» óz alańynda ótken tartysty kezdesýde «Borýssııa D» komandasyna ese jiberdi.
Italııa chempıonatynyń eń keıingi oıynynda «Napolıden» jeńilgen «Iýventýstiń» bul joly «Portýge» áli kelmedi. Al «Portý» tórt teń oıynnan keıin birinshi ret jeńiske jetip otyr. Portýgalııadaǵy «Dragaý» stadıonynda ótken matchta alań ıeleri eki taımnyń alǵashqy mınýtynda jyldam gol soǵyp, mańyzdy jeńisine qol jetkizdi. Atap aıtar bolsaq, 1-mınýtta Mehdı Taremı, 46-mınýtta Mýssa Marega mergendigimen kózge tústi. Qonaqtardan 82-mınýtta Federıko Keza bir golmen jaýap qatty.
Qatar ótken ekinshi matchta «Borýssııa D» qonaqta «Sevılıa» klýbynan 3:2 esebimen basym tústi. Dortmýndtyq komandadan Erlıng Holand dýbldiń avtory atansa, Mahmýda Daýda komandasynyń úshinshi golyn soqty. Ispanııalyqtardan Sýso men Lıýk de Iong óz attaryn tabloǵa jazdyrtty.