Elimizde aqpan aıynyń alǵashqy kúninen bastap koronavırýs ınfeksııasyna qarsy vaksınasııalaý bastalǵan bolatyn. Búgin el astanasynda ótken arnaıy onlaın brıfıngte osyǵan deıin atqarylǵan jumystar jaıly esep berildi, dep habarlaıdy Egemen.kz qala ákimdiginiń resmı saıtyna silteme jasap.
Brıfıngke Qoǵamdyq densaýlyq saqtaý basqarmasy basshysynyń orynbasary Álııa Rústemova, Nur-Sultan qalasy Alǵashqy medısınalyq sanıtarııalyq kómekti uıymdastyrý bóliminiń basshysy Álııa О́mirzaqova qatysty.
«Búgingi tańda elordada vaksınasııanyń úshinshi aptasy aıaqtalýda. Vaksınasııa emhanalarda ınfeksııalyq stasıonarlardyń, jedel medısınalyq járdemniń, alǵashqy medısınalyq-sanıtarlyq kómek uıymdarynyń, kópbeıindi stasıonarlarda qabyldaý bólimsheleriniń medısına qyzmetkerlerine júrgizilýde. Tıisti kontıngentten (6300 adam) búgingi kúni 1 980 adam vaksınasııalandy», dedi basqarma basshysynyń orynbasary.
Ol sózin jalǵaı otyryp, vaksınasııalanǵandardyń arasynda asqynýlar bolmaǵanyn aıryqsha atap ótti.
«Qazirgi ýaqytta reseılik Gam-KOVID-Vak vaksınasymen júrgizilýde. Preparat eki komponentti, úsh apta aralyqpen eki ret engiziledi. Ekinshi komponentpen vaksınasııalaý 22 aqpanda bastalady. Vaksınasııanyń tolyq kýrsynan keıin 1,5 aı ishinde aǵzanyń ımmýndyq reaksııasy týady, sondyqtan vaksınasııalanǵandarǵa aldyn alý sharalaryn saqtaýdy jalǵastyrý qajet.
Vaksınanyń kelesi jetkizilimi aqpan aıynyń sońyna kútilýde», dedi Álııa Rústemova.
Vaksınalardyń jańa partııasy kelip túsken ýaqytta medısına qyzmetkerlerin egý ary qaraı jalǵasady, sondaı-aq pedagogtardy, kúsh qurylymdarynyń qyzmetkerlerin, sozylmaly aýrýlary bar naýqastardy jáne basqa da jurtty kezeń-kezeńimen egý bastalady.
«Alǵashqy medısınalyq-sanıtarlyq kómek uıymdarynda vaksınasııa júrgizý úshin egý kabınetteri, kútý zaldary fızıkalyq qashyqtyq talaptaryn saqtaı otyryp daıyndaldy, onda vaksınasııalanǵan adamdar 30 mınýt boıy medısınalyq baqylaýda bolýy tıis. Vaksınalardy tasymaldaýǵa arnalǵan 20 muzdatqysh jáne 82 termokonteıner bar. Qosymsha 22 muzdatqysh qondyrǵy (120 lıtrden) satyp alyndy. Bul qajettilikti tolyǵymen jabady. Barlyq tıisti tulǵalar KVI-ǵa qarsy vaksınasııany tirkelgen emhanalarda tegin alatyn bolady», dep vedomstvo ókili sózin aıaqtady.