Elimizde óndiriletin dári-dármek kólemi artyp keledi. Densaýlyq saqtaý mınıstrliginiń málimetinshe, 2025 jyldyń qorytyndysy boıynsha farmasevtıkalyq ónim óndirisiniń kólemi 191,1 mlrd teńgege jetken. Bul kórsetkish 2024 jylmen salystyrǵanda 8,7 paıyzǵa joǵary, dep habarlaıdy Egemen.kz.
Densaýlyq saqtaý vıse-mınıstri Tımýr Muratov farmasevtıka salasyna tartylǵan ınvestısııa kólemi 142,8 mln dollarǵa jetkenin aıtty. Sondaı-aq otandyq farmasevtıkalyq ónim eksporty 84 mln dollarǵa deıin ósken.
Qazirgi tańda Qazaqstanda 209 otandyq taýar óndirýshi tirkelgen. Onyń ishinde 43 kásiporyn dári-dármek shyǵarsa, 166 kompanııa medısınalyq buıymdar óndiredi.
Mınıstrliktiń deregine sáıkes, otandyq óndirýshilerdiń úlesi tabıǵı kólemde 39,8 paıyzǵa jetken. Bul kórsetkish dárilik zattardy tańbalaý jáne qadaǵalaý júıesiniń málimetteri arqyly rastalǵan.
Otandyq farmasevtıka óndirisiniń ósýi eldiń dári-dármek qaýipsizdigin kúsheıtip, ımportqa táýeldilikti azaıtýǵa múmkindik beredi.
Eske salaıyq, Úkimet Qaraǵandy oblysynda 74 túrli dárilik zat shyǵaratyn farmasevtıkalyq zaýyt salý jobasyn maquldady.
Densaýlyq saqtaý mınıstrligi men «Hımfarm» AQ arasynda halyqty qoljetimdi dári-dármekpen qamtý jáne otandyq óndiristiń úlesin arttyrýǵa baǵyttalǵan ınvestısııalyq kelisim aıasynda Shymkent farmasevtıkasyna 39,5 mlrd teńge ınvestısııa quıylady.