Ońtústik Koreıa jasandy ıntellektke negizdelgen adamǵa uqsas robottardy damytýǵa arnalǵan aýqymdy baǵdarlamany iske qosyp otyr. Joba sheńberinde el aldaǵy bes jyl ishinde 50,4 mlrd von (33,5 mln dollar) ınvestısııa salýdy kózdeıdi, dep jazady Egemen.kz.
Yonhap agenttiginiń málimetinshe, baǵdarlama 2030 jylǵa deıin Koreı ǵylym jáne tehnologııa ınstıtýtynyń jetekshiligimen júzege asady. Ol bıyl bastalǵan úkimettik «K-Moonshot» bastamasynyń bir bóligi sanalady. Bul baǵdarlama jasandy ıntellektini ǵylym men tehnologııa salasyndaǵy zertteý jáne ázirleý jumystaryna keńinen engizýdi kózdeıdi.
Joba sheńberinde LG Electronics Inc. jáne jergilikti WIRobotics startapy robototehnıkalyq ozyq platformalar men adamǵa uqsas robot úlgilerin ázirleıdi. Aldaǵy ýaqytta bul tehnologııalardy jappaı óndiris deńgeıine shyǵarý josparlanǵan.
Jambylda baıqaýdy robot júrgizdi: Jańa format kórermendi tańǵaldyrdy
Jasandy ıntellekt modelderin ázirleýge iri ýnıversıtetter men ǵylymı-zertteý ortalyqtary da qatysady.
Baǵdarlamanyń basty maqsaty – Ońtústik Koreıany álemdik naryqta gýmanoıd robottar óndirisi boıynsha jetekshi elderdiń birine aınaldyrý.
Jobada jasalǵan robottar aldymen aýrýhanalarda jáne kútim ortalyqtarynda synaqtan ótedi. Bul olardyń adamdarǵa kútim kórsetý sııaqty uzaq ári kúrdeli mindetterdi oryndaý qabiletin tekserýge múmkindik beredi.
Buǵan deıin Qytaıda da adamǵa uqsas robottar paıda bolǵany týraly jazǵanbyz.