Búgin Jambyl oblysynda qaıǵyly jaǵdaı oryn aldy. Sarysý aýdanynyń ortalyǵy Jańatas qalasynyń 2-yqshamaýdanyndaǵy 5 qabatty turǵyn úıdiń 3-shi qabatynan órt shyǵyp, 16 sharshy metr aýmaqty sharpydy. dep habarlaıdy Egemen.kz oblys ákiminiń baspasóz qyzmetine silteme jasap.
Tilsiz jaýdyń saldarynan kıimder men jıhazdar órtenip ketken. Páter ishinde ata-anasynyń qaraýynsyz kámelet jasyna tolmaǵan 2015, 2016, 2017, 2019 jáne 2020 jyly týǵan bes bala qalyp qoıǵan. Belgili bolǵanyndaı, balalardyń ákesi jumysta bolǵan, al anasy dúkenge shyǵyp ketken. О́rt saldarynan bes bala da tútinge ýlanyp, jedel túrde aýrýhanaǵa jetkizildi. О́kinishke qaraı, araǵa biraz ýaqyt salyp, bári de kóz jumǵan.
Qaıǵyly oqıǵanyń sebebin anyqtaý úshin Jambyl oblysynyń ákimi Berdibek Saparbaevtyń tapsyrmasymen arnaıy komıssııa quryldy. Oblys ákiminiń orynbasary Ulan Jazylbektiń tóraǵalyǵymen atalǵan komıssııa oqıǵa ornyna attandy. Sondaı-aq, Jańatas qalasyna oblys prokýrory Nurǵalym Ábdirov pen oblystyq polısııa departamentiniń bastyǵy Janat Súleımenov te attandy. Sonymen qatar, jolǵa Jambyl oblystyq tótenshe jaǵdaılar departamentiniń basshysy Ermek Mombaev pen jedel top, jyljymaly órt-tehnıkalyq zerthana, órt sóndirý qyzmeti men apattyq-qutqarý qyzmetiniń psıhologtary da shyqty. Jalpy, komıssııa quramyna prokýratýra, polısııa departamenti, tótenshe jaǵdaılar jónindegi departament pen basqa da múddeli memlekettik organdardyń ókilderi engen. Jergilikti atqarýshy organdar tarapynan qara jamylǵan otbasyna jan-jaqty kómek kórsetiledi. Psıholog mamandar jumyldyrylyp, balalardy jerleý sharalaryn uıymdastyrýǵa járdem beriledi.
Oqıǵa ornynda órt sóndirý qyzmetiniń 6 qyzmetkeri men 1 dana tehnıka jumys atqardy. Qazirgi kezde órt tolyǵymen aýyzdyqtaldy.