SQO Esil aýdany polısııa bóliminiń kezekshi bólimine Birlik aýylynyń mańynda eki balanyń adasyp ketkeni jaıly habarlama kelip túsken. 18 aqpanda 17 jáne 7 jastaǵy aǵaıyndylar shanaǵa jegilgen atpen Esil ózeniniń jaǵasynda baǵylyp júrgen jylqylardy qaraýǵa shyqqan. Kóp uzamaı qar jaýyp, kóz ashyrmas qatty boran soqqan. Al balalarda qaltafon bolmaǵan.
Esil aýdanynyń polısııa bóliminiń bastyǵy, podpolkovnık Erlik Eslámbekov habarlama alǵannan keıin ÝAZ «Patrıot» avtomashınasy jáne úsh qarda júretin kólikpen aýdandyq bólimniń tájirıbeli qyzmetkerlerinen quralǵan toppen Birlik aýylyna tartqan. TJB qyzmetkerleri men qoryqshylar jáne jergilikti turǵyndar da joǵalǵan balalardy shuǵyl izdeýge kirisken. Tóńirekti mashınalarmen, qarda júretin kóliktermen jáne aýyl turǵyndary salt atpen aralap shyqqan. Oqıǵa keshki mezgilde bolǵan edi. Aınalanyń qatty borannan jáne qarańǵylyqtan kórinbeýi izdeý jasaǵyna saqtyq sharalaryn saqtaýǵa týra keltirip, olar ózderi de adaspas úshin juptasyp júrýge májbúr bolǵan.
Aqyry balalar aýyldan birneshe shaqyrym jerde, saǵat tili 23.30-dy kórsetkende bir-aq tabyldy. Borannan yqqan at balalarǵa qaıyrý bermeı, olardy aýyldan basqa baǵytqa qaraı alyp ketipti. Sosyn balalar aýylǵa jaıaý jetpek bolǵan. Aǵasy ústindegi barlyq syrt kıimin sheship, inisin orap, arqasyna mingizip alǵan eken. О́zderi ábden sharshaǵan, sóıleýge de shamalary kelmegen.
Sóıtip, polıseıler, aýyl turǵyndary, qoryqshylar men qutqarýshylardyń kúsh biriktirýiniń arqasynda ókinishti jaǵdaıǵa jol berilmeı, balalar aman-esen ata-anasyna oraldy.
Soltústik Qazaqstan oblysy