Aqpannyń aq borany Taıynsha aýdanynda da qatty bolyp, Petropavldan kelgen 37 jasar balyqshyny adastyryp jibergen. Ol óziniń Makashev aýylynyń túbindegi Qundykóldiń mańynda adasqanyn qaltafonmen polısııaǵa habarlap úlgergen.
Ýchaskelik polısııa ınspektory, aýyl ákimi, TJ qyzmetkerleri, aýyl turǵyndary, qoryqshylar bar - bári joǵalǵan adamdy izdeýde kúsh jumyldyrǵan. Sonyń ishinde ańshylyq sharýashylyǵynyń basshysy Qoblan Bekmýrzın óziniń «Hıshnık» markaly qar men qopada júretin kóligimen adasqan adamdy tańǵy saǵat tórt kezinde tapqan. Balyqshy úsýden aman, aýylǵa jetkizildi, qazir onyń ómirine esh qaýip joq.