«Eńbek resýrstaryn damytý ortalyǵy» AQ derekteri boıynsha, 2020 jyldyń sońynda jumyspen qamtý ortalyqtarynda tirkelgen jumyssyzdar sany jumys kúshi sanynyń 1,5%-yn, ıaǵnı 141,8 myń adamdy qurady.
Tirkelgen jumyssyzdyqtyń eń joǵary deńgeıi Batys Qazaqstan (4%), Atyraý (3,3%) jáne Qyzylorda (2,9%) oblystarynda baıqalady. Bul rette 2021 jyldyń basyndaǵy jalpy jumyssyzdyq kórsetkishi 4,9%-dy qurady, bul 2020 jylǵy 3-toqsanmen salystyrǵanda 0,1 paıyzdyq tarmaqqa tómen. Jalpy jáne tirkelgen jumyssyzdyq arasyndaǵy aıyrmashylyq olardy esepke alý ádisnamasymen túsindiriledi, barlyq jumyssyz jumyspen qamtý ortalyqtarynda tirkelgisi kelmeıdi, óz betinshe jumys izdeýdi qalaıdy.
«О́tken toqsanmen salystyrǵanda, 2020 jylǵy 4-toqsanda jumyssyzdar sany 453 myń adamǵa deıin – 1,8 myńǵa tómendedi, alaıda 2019 jyldyń osy kezeńimen salystyrǵanda jumyssyzdar sany 11,6 myńǵa joǵary. Bul rette jastar arasyndaǵy jumyssyzdyqtyń 2019 jylǵy 4-toqsandaǵy 81,1 myń adamnan ótken jyldyń sońynda 76,6 myńǵa deıin qysqarǵanyn atap ótýge bolady», dedi ERDO Strategııa jáne jobalyq basqarý departamentiniń dırektory Aleksandra Molchanovskaıa.
Ol sondaı-aq Qazaqstandaǵy epıdemııalyq jaǵdaıdyń jaqsarýy jáne ekonomıkalyq belsendiliktiń qalpyna kelýi adamdardy burynǵy jumys rejimine birtindep qaıtarý esebinen belsendi jumyspen qamtylmaǵan adamdar sanynyń qysqarýyna yqpal etkenin atap ótti. Osylaısha, ýaqytsha jumyspen qamtylmaǵandardyń sany (kásiporynnyń qyzmetin toqtata turý nemese jumys berýshiniń bastamasy boıynsha jumys istemegen adamdar) 147 myń adamǵa deıin qysqardy, 2020 jylǵy 2-toqsanda 536 myń adam boldy. Alaıda 2019 jyldyń sońyndaǵy jaǵdaımen salystyrǵanda, 2020 jyldyń 4-toqsanynda bul sanat 48 myń adamǵa kóp.
ERDO málimetteri boıynsha, belsendi jumyspen qamtýǵa qatysýshylar sanynyń artqany baıqalady: 2020 jylǵy 4-toqsanda jumyspen qamtylǵandardyń sany 3-toqsanmen salystyrǵanda 0,4%-ǵa (31,3 myń adam) ósip, 8,75 mln adamdy qurady. 4-toqsanda jaldamaly jumyskerlerdiń sany 0,3%-ǵa (676 myń), ózin-ózi jumyspen qamtyǵandardyń sany 0,4%-ǵa (2,1 mln) ulǵaıdy.
О́tken jyldyń sońyndaǵy derekter boıynsha, ekonomıkalyq qyzmet túrleri bólinisinde jumyspen qamtylǵandardyń 54,9%-y (4,8 mln) saýda, aýyl sharýashylyǵy, bilim berý jáne ónerkásip salalarynda eńbek etedi. Bul rette 2019 jyldyń sońyndaǵy derektermen salystyrǵanda, jumyspen qamtýdyń eń kóp qysqarýy turý jáne tamaqtaný boıynsha qyzmetter (-12,1%), óner jáne oıyn-saýyq (-5,8%), kólik jáne qoımalaý (-3,7%), ákimshilik jáne qosalqy qyzmet kórsetý (-3,1%), kásibı jáne ǵylymı qyzmet (-3%) sııaqty sektorlarda baıqalady. Bul rette bir jyldyq kezeńde de, toqsan ishinde de 2020 jyldyń sońynda jyljymaıtyn múlik (+9,2%), basqa da jeke qyzmetter (+6,8%), qarjy jáne saqtandyrý (+3,9%) jáne densaýlyq saqtaý (+3,8%) operasııalarymen baılanysty salalarda jumyspen qamtylǵandar sanynyń ósýi baıqalady.
«Joǵaryda atalǵan salalarda jumyspen qamtýdyń tómendeýi shekteý sharalarynyń aıasynda kútilýde. Bul salalar eń kóp zardap shekti, endi birtindep qalpyna keltirý jalǵasýda», dep qorytyndylady A.Molchanovskaıa.