Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda turǵyn úı saıasatynyń jańa tásilderin jarııalady. Sonymen qatar «Otbasy banki» bazasynda «Turǵyn úımen qamtamasyz etý jónindegi ortalyq» qurylatynyn aıtty, dep habarlaıdy Egemen.kz
«Kezek máselesin sheshý úshin Memleket basshysy jergilikti atqarýshy organdardaǵy turǵyn úı kezektiligin bere otyryp, «Qazaqstannyń turǵyn úı qurylys jınaq banki» negizinde tolyqqandy damý jáne qoldaý ınstıtýty retinde «Otbasy bank» qurýdy tapsyrǵan bolatyn. «Otbasy banki» jumysynyń negizgi qaǵıdaty eń aldymen, halyqtyń áleýmettik osal toptary úshin baspananyń qoljetimdiligin arttyrýǵa baǵyttalady», dedi mınıstr.
Onyń aıtýynsha, «Otbasy banki» bazasynda «Turǵyn úımen qamtamasyz etý jónindegi ortalyq» qurylady.
«Ol úıge muqtaj jandardy esepke alady. Sondaı-aq, qoljetimdilik satysyna sáıkes turǵyn úıdi kezekke qoıylǵan kúni boıynsha bóledi. «Turǵyn úımen qamtamasyz etý jónindegi ortalyq» bazasy jeke tulǵalardyń memlekettik derekqorlarymen ıntegrasııalanady. Bazaǵa derekti qaıta engizýge jol berilmeıdi. Azamattar memlekettik baǵdarlamalarǵa bir ret qana qatysa alady», dedi Beıbit Atamqulov.