Reseıdiń Fýtbol ulttyq lıgasyndaǵy (FUL) eń qundy oıynshylarynyń tizimi jarııalandy. Úzdikter arasynda Qazaqstannyń da ókili bar.
Kúni keshe ǵana Samaranyń «Krylıa Sovetov» klýbynyń jeıdesin kıgen Abat Aıymbetov óziniń áriptesteri Ivan Sergeev jáne Nıkıta Chernovpen birge ekinshi jáne tórtinshi oryndardy ózara bólisýde. Nemisterdiń Transfermarkt portaly usynǵan málimetke súıensek, olardyń árqaısysy 1,5 mln eýroǵa baǵalanyp otyr. Al bul kóshti aıtýly klýbtyń taǵy bir oıynshysy Anton Zınkovskıı bastap tur. Onyń transferlik quny – 2,5 mln eýro. Úzdik bestikti «Orenbýrgtiń» jartylaı qorǵaýshysy Aleksandr Noıok (1,1 mln eýro) qorytyndylady.
Abat Aıymbetov 25 jasta. Ol Qyzylordanyń týmasy. Sporttyq jolyn «Aqtóbe» klýbynda bastaǵan qandasymyz byltyrǵy maýsymdy Almatynyń «Qaıratynda» ótkizip, 20 kezdesýde 10 gol soqty. 2019 jyly Qazaqstannyń ulttyq quramasynyń jeıdesin kıdi. Respýblıkamyzdyń bas komandasy sapynda 12 ret jasyl alańǵa shyǵyp, eki goldyń avtory atandy.