Bilim salasyndaǵy máselelerdiń biri – materıaldyq-tehnıkalyq baza. Shymkenttegi oqý kabınetteriniń nebári 32 paıyzy jabdyqtalǵan. Shymkent qalasynyń ákimi Murat Áıtenov onlaın formattaǵy halyq aldyndaǵy esep berý kezdesýinde bıyl mektepterdi jabdyqtaýǵa 6 mlrd teńge bólingenin aıtty, dep habarlaıdy Egemen.kz.
Mektepter 259 arnaıy pándik kabınetpen jaraqtandyrylady. Byltyr jyl basynda Shymkenttiń 27 oqýshysyna bir kompıýterden kelse, qazir 4 oqýshyǵa bir kompıýterden keledi.
Odan bólek, bıyl 28 mekteptiń aýlasyna sport alańdary salynady. О́tken jyly balalardyń qaýipsizdigi úshin ishte ájethanasy joq 36 mektepke ájethana ornatylyp, bul másele tolyq sheshilse, bıyl bilim berý uıymdaryna 100 paıyz beınebaqylaý jáne týrnıket qoıylady. Olar polısııamen ıntegrasııalanady.
Kásibı bilim beretin mekemelerge keler bolsaq, byltyr 2 kolledj jabdyqtalsa, bıyl taǵy 5 kolledj jabdyqtalady. IT, qurylys, dánekerleýshi, radıobaılanys mamandyqtary boıynsha kásibı baǵdar beretin quzirettilik ortalyqtary ashylady.
Bilim berý taqyrybyn qorytyndylaǵan ákim balanyń bilimi men tárbıesinde ata-ana men ustazdyń jaýapkershiligi jóninde basa aıtty.
«Bilim berý uıymdarynyń basshylaryna bilim sapasyna qatysty joǵary talap qoıylyp otyr. Barlyq dırektorlardy adal jumys isteýge, bilim sapasyn arttyryp, bolashaq úshin qyzmet etýge shaqyramyn. Sondaı-aq, jasóspirimder arasyndaǵy sýısıdti zerttegen Halyqaralyq IýNISEF qory Qazaqstanda ata-analar balalarymen kúnine tek 15 mınýt qana sóılesetinin anyqtapty. Ata-analardan balalarymyzdyń bilimi men tárbıesine kúnine keminde bir saǵat ýaqyt bólýdi ótinemin» - dedi Murat Dúısebekuly.