Nur-Sultan qalasyndaǵy Táýelsizdik saraıynda top-deńgeıdegi gımnastıka ortalyǵy ashylady. Bul týraly «Astana Venue Management» JShS-nyń bas dırektory Málik Hasenov aıtty dep habarlaıdy Egemen.kz
«Buǵan deıin Táýelsizdik saraıy iri is-sharalarǵa – forýmdar, kórmelerge, halyqaralyq delegasııalardyń jáne Memleket basshysy qatysatyn is-sharalarǵa jalǵa berý esebinen qyzmet kórsetip kelgen bolatyn. Qazirgi ýaqytta 2008 jyly salynǵan Táýelsizdik saraıynan bólek «EKSPO» halyqaralyq kórme ortalyǵy, «EKSPO» kongress ortalyǵy jumys isteıdi. Olar «QazExpoCongress» kompanııasyna tıesili», dedi ol Nur-Sultan qalalyq máslıhatynyń áleýmettik-mádenı damý máseleleri jónindegi komıssııasynyń otyrysynda.
Onyń aıtýynsha, osy ýaqytqa deıin Táýelsizdik saraıynda uıymdastyrylatyn 20 is-shara endigi ýaqytta «EKSPO» aýmaǵynda ótedi.
«Qalǵany 2 negizgi is-shara ǵana. Biraq, soǵan bola 38 myń sharshy metrdi bos ustap otyrý maqsatqa saı kelmeıdi dep sheshtik. Táýelsizdik saraıynda balalar úshin saraı ashý tujyrymdamasy usynyldy. Aıtalyq, ol jerde aýmaǵy 4,3 myń sharshy metrdi quraıtyn Kongress-zaly bar. Tóbesiniń bıiktigi 14 metrdi quraıdy. Sondyqtan qalalyq sport basqarmasymen birge sol jerde top-deńgeıdegi gımnastıka ortalyǵyn qurý sheshimi qabyldandy. Bul oraıda ǵımarat ınfraqurylymy búlinbeıdi jáne buqaralyq sport 3 esege artatyn bolady», dedi Málik Hasenov.