El Prezıdentiniń qatysýymen ótken Ulttyq qoǵamdyq keńes otyrysynda búgingi kúngi ózekti degen birqatar másele talqyǵa tústi. Basqosýda Prezıdent Qasym-Jomart Toqaev halyqtyń nazarynda júrgen máseleler jóninde mańyzdy málimdeme jasady.
Bul málimdeme elimizdegi saıası reformalardyń jalǵasy bolyp otyr. Iаǵnı bul partııalardyń parlamentke ótý mejesiniń azaıýy, sonymen qatar bıýlletenderdiń barlyǵyna «qarsy» degen normanyń engizilýi zań boıynsha ári qaraı jalǵasyn tabady degen sóz.
Keleli basqosýda aýyl ákimderin saılaý jónindegi naqty merzim anyqtalyp, 2024 jyldan bastap aýdan ákimderin saılaıtyn tetikter engizilmek. Bul bizdiń elimizdegi saıası kózqarastyń qalyptasqanyn bildiredi. Qazaqstandyqtardy tolǵandyrǵan eń basty jaıt – jerdi sheteldikterge jalǵa berý-bermeý máselesine núkte qoıyldy. Qasym-Jomart Kemeluly Qazaqstandaǵy sheteldik azamattarǵa jerdi jalǵa berýge, satýǵa tolyq tyıym salý jónindegi zań normasy engiziletinin aıtty. Bul bizdiń elimizdegi jer máselesine qatysty jalpyulttyq dıskýssııaǵa núkte qoıylǵandyǵyn kórsetedi. Iаǵnı jer resýrstary tek Qazaqstan azamattaryna qyzmet etetin bolady. Degenmen jer – ekonomıkalyq resýrs. Ol bizdiń halqymyzǵa ıgilik ákelýi kerek. Bizdiń elimizdegi jer resýrstaryn memlekettiń damýy úshin paıdalaný jóninde máseleni sheshý úshin Úkimet janynan qoǵamdyq komıssııa qurylady. Bul qoǵamdyq komıssııa jer máselesin pysyqtaıtyn bolady. Jyldyń aıaǵyna deıin Úkimet bul máselege qatysty óz usynystaryn engizýi qajet. Qazaqstannyń jer resýrstaryna baılanysty máseleleri búgingi tańdaǵy eń negizgi ekeni eshkimge jasyryn emes. Sol sebepti bul másele jan-jaqty pysyqtalyp, túıtkilderi tolyq anyqtalýy qajet.
Basqosýda Keńestiń memleketimizdiń, el azamattarynyń múddesi úshin jumys isteıtindigin taǵy bir baıqadyq. Búgingi tańda Ulttyq keńestiń tek qoǵamdyq uıym emes, elimizdegi saıası-ekonomıkalyq reformalardyń basty alańyna aınalǵanyn da ańǵarý qıyn emes.
Erlan SAIROV,
Parlament Májilisiniń depýtaty,
Ulttyq qoǵamdyq senim keńesiniń múshesi