Beınekonferensııa formatynda Qazaqstan men Qytaı arasyndaǵy konsýldyq konsýltasııalardyń 19-shy otyrysy ótti, dep habarlaıdy Egemen.kz.
Qazaqstandyq delegasııaǵa Qazaqstan Respýblıkasynyń Konsýldyq qyzmet departamentiniń dırektory Baýyrjan Aqataev, Qytaı delegasııasyna Qytaı Halyq Respýblıkasynyń Syrtqy ister mınıstrligi Konsýldyq departamentiniń dırektory Sýı Aımın tóraǵalyq etti.
Kelissózder barysynda taraptar eki el azamattarynyń quqyqtary men múddelerin qorǵaýdaǵy ekijaqty yntymaqtastyqtyń ózekti konsýldyq-quqyqtyq máselelerin jan-jaqty talqylady.
Taraptar Qazaqstan men Qytaı azamattarynyń eki eldiń halyqaralyq áýejaılaryna kirýi/shyǵýynyń jáne tranzıtpen ótýiniń qoldanystaǵy tártibi týraly ózekti aqparatpen almasty.
Sonymen qatar, Qazaqstan azamattaryna Qytaıǵa barý úshin QHR jeke týrıstik jáne iskerlik vızalaryn berýdi jalǵastyrý múmkindigi talqylandy.
Konsýltasııalar barysynda Qazaqstan tarapy eki memlekettiń ulty qazaq azamattarynan quralǵan otbasylardyń qaıta qosylý máselelerin kóterdi.