Qaıyrymdylyq – asyl qasıet. Qysylǵanǵa demeý, jyǵylǵanǵa medeý bolyp, jan-jaǵyna shapaǵat shýaǵyn shashyp júretin jandar az emes. Olar ózderiniń bul isin azamattyq boryshyna balaıdy. Ásirese, el basyna qater tónip, pandemııa ýshyǵyp turǵan syn saǵatta barymen bólisip, aýyr júkti jeńildetken atymtaı jandar tutas qoǵamǵa úlgi bola bildi.
Halqymyzdyń qaısar uly Jaqsylyq Úshkempirov «Qazaqstannyń Eńbek Eri» ataǵyn alyp turǵan sátte: «Elimizde kóp bolsa 5 myńnan asa aýyl bar shyǵar. Eń bolmasa qazaqtyń bes myń jigiti sol aýylyn kórkeıtse, odan asqan qandaı baqyt kerek?» dep edi. Bul sóz talaı azamatqa rýh bergeni ras. «Áýeli ózińniń úıińe jaq, onan soń aýylyńa jaq, onan soń otan-aımaǵyńa, onan soń halqyńa jaq» deıtin qasterli qazaq sóziniń astarynda úlken oı jatyr.
Búgingi áńgimemizge ózek bolyp otyrǵan belgili qoǵam qaıratkeri, rýhanııat janashyry Qusman Shalabaevty ısi qazaq tanıdy. Qaıyrymdylyq qanat qaqqan qaı tusta da abzal azamattyń esimi erek atalatynyn jıi baıqaımyz. Kóp balaly otbasynda dúnıege kelip, beınetpen beldese júrip erjetken ol adal eńbektiń sharyǵynda qaıraldy. El ekonomıkasynyń eńse tikteýine atsalysyp, óziniń jeke kásibin órge súıredi, qanshama azamatty turaqty jumyspen qamtydy.
Elbasy Nursultan Nazarbaev «Bolashaqqa baǵdar: rýhanı jańǵyrý» maqalasynda «Týǵan jer» baǵdarlamasyna aıryqsha toqtala kelip, kindik qany tamǵan jerine kómek kórsetip júrgen kásipkerler men zııaly qaýym ókilderin qoǵam bolyp qoldaý qajettigin aıtqan bolatyn.
О́ner men bilimdi, sport pen rýhanııatty qoldaýǵa qomaqty úles qosyp júrgen azamattyń eline, týǵan jerine jasaǵan qamqorlyǵyn tizbeleı berýge bolady. Tájtajal qaharyna mingen qıyn kezeńde demi tarylyp, dertpen arpalysyp jatqan jerlesterine tynys alý apparatyn jetkizip, talaı jannyń kókiregindegi úmit sáýlesin qaıta jaqty. Týǵan jeri Maqanshydaǵy №2 medısınalyq aýrýhananyń emdeý-saýyqtyrý bólimine zamanaýı quraldar alyp berdi. Onyń ishinde massaj-kereýet, aıaq býyndaryna arnalǵan, tolyq adamdarǵa arnalǵan jáne trenajer-velosıped bar. Maqanshyǵa kireberistegi Qabanbaı qaqpasyn ornatyp, dál sol jerde, Jaıtóbe baýyrynda batyr baba kesenesiniń qurylysyn júrgizdi. Osyndaǵy «Túz qyrandary» sport mektebiniń qurylysyna, Úrjar aýdanynyń birneshe ımamynyń qajylyq saparǵa barýyna demeýshilik jasady.
Taýlardyń basy bıik bolǵanymen, tabany jerde turatynyn umytpaıtyn aqedil azamat qoǵamdyq jáne memlekettik qyzmet minberine shyqqanda da elmen birge boldy. Tabany kúrekteı on bes jyl Almaty qalalyq máslıhat depýtaty bola júrip, rýhanııattyń órken jaıýyna, halyqtyń áleýmettik jaǵdaıyn jaqsartýǵa hal-qaderinshe úles qosty. Qazaq kúresin álemdik dárejege kóterýge atsalysyp, tuńǵysh ret qala ákiminiń júldesi úshin halyqaralyq doda uıymdastyrdy. Almaly aýdanynda boı kótergen meshittiń qurylysyna, termeshilerdiń respýblıkalyq baıqaýyna, Almaty qalalyq jas aqyndar aıtysyna, turaqty túrde ótetin «Táýelsizdiktiń tal besigi – Almatym» atty jas talapker aqyndar aıtysyna da demeýshilik etti. Sol sııaqty, mektep oqýshylary arasynda birneshe jyl qatarynan uıymdastyrylǵan «Balǵyn dáýren – bal dáýren. Ánshi bolý armanym» atty jáne «Sóz óneri» baıqaýlary Qusman Shalabaevtyń bastamasymen ótip keledi. Qanshama býynnyń súıikti kınosyna aınalǵan «Taqııaly perishte» fılminiń jalǵasy retinde «Taılaqtyń taqııasy» kınokartınasyn túsirip, atalǵan óner týyndysyn halyqaralyq Kann festıvaline alyp barýǵa muryndyq boldy. Almaty qalasy Almaly aýdany ákimdiginde qyzmet ete júrip, qalanyń áleýmettik-qoǵamdyq ómirine belsene aralasyp kele jatqan ol Uly Otan soǵysy ardagerlerine, zeınetkerlerge, kómekke zárý jandarǵa qolushyn sozyp, járdemin kórsetip keledi. «Qaıyrymdylyq jasaý – qashannan qanymyzǵa sińgen qasıet, onyń bodaýy tek bir Alladan», degen keıipkerimiz jaqsylyq jasaǵan saıyn tirshiligiń de túzele beretinin aıtady.
– Týǵan jer – ár adamnyń túp qazyǵy, aıbary men aıbyny. Elbasymyz ózi usynǵan «Týǵan jer» baǵdarlamasynda «qazaqpyn» dep soqqan júrekterdiń dúrsilin dóp basty. Týǵan jerdiń tarıhı eskertkishteri men nysandaryn qalpyna keltirý jumystary zerdeli urpaqtyń atqarar isi bolýy tıis. Muny jastarymyzdyń boıyna sińirýimiz qajet. Qazirgi kúni týǵan jerine shynaıy janashyrlyq tanytyp júrgen talaı azamat eldiń rızashylyǵyna bólenip júr. Aıtalyq, belgili mesenat, kásipker Baýyrjan Ospanov sııaqty azamattar atamekeni men jalpy ulttyq múdde jolynda kóptegen eńbek sińirdi. Osyndaı elim degen jigitter barshylyq. Elbasynyń baǵdarlamada usynǵanyndaı, men de týǵan jerime shama-sharqymsha qolushyn berýden bas tartqan emespin. Aýylymyzǵa sport alańyn salýǵa bastama kóterip, mekteptiń jóndeý jumystary men áleýmettik salada biraz sharýalar jasaldy. Týǵan mekenge jylyna bir-eki ret at basyn burmasaq, kóńilimiz kónshimeıdi. Jaqsylyq jasasań, aýylyńa jasa, odan artylyp jatsa tutas halqyńa jasa. Júregimizdiń túkpirinde sol aıaýly mekenge degen sarshatamyz saǵynysh jatady. Týǵan jerdi túletý – ár adamnyń perzenttik boryshy dep esepteımin, – deıdi Qusman Shalabaev.
Indet irgemizden enip, ómirimiz ben túsinigimiz basqa arnaǵa burylǵan tusta «Jaqynyńa janashyr bol!» degen sózdi jıi aıtatyn boldyq. Osynaý qıyn kezeń bizge tirshilikti araıǵa bóleıtin uly kúsh – jaqsylyq jasaý, meıirim tanytý, baryńmen bólisý deıtin qasıetterden quralatynyn dáleldep berdi. Qusman aǵamyz tilge tıek etkendeı, týǵan jeriniń esimin tumar etken árbir perzent kúshimen de, isimen de halqyna paıdasyn tıgizýdi kózdese, qara basynyń qamyn emes, qarashanyń baǵyn oılaıtyn úlken júrekti azamattar kóbeıe berse kóshimiz kórkeıe bermek.
ALMATY