Bul týraly «Azamattarǵa arnalǵan úkimet» memlekettik korporasııasynyń basqarma tóraǵasy Ádil Qojyqov feısbýk paraqshasynda habarlady. Daryndylar pýlyna (kadr rezervine) qatysýǵa ótinishterdi qabyldaý 2021 jylǵy 1 naýryzda bastalady.
«Mınıstr Baǵdat Mýsın óz paraqshasynda kadrlyq rezerv týraly aıtqan bolatyn. Biz daryndylar pýlyn – bolashaqta kásipqoı mamandardan quralǵan myqty komanda jasaqtaýdy josparlap otyrmyz. Oǵan tek bizdiń qyzmetkerler ǵana emes, kez kelgen azamat qatysyp, ótinim bere alady», – dep jazdy Ádil Qojyqov.
Jobaǵa joǵary bilimi jáne keminde 5 jyl jumys ótili bar tulǵalar qatysa alady. Úmitkerler úshin ǵylymı dárejeniń bolýy rezervke alý barysynda artyqshylyq bolyp esepteledi. Tirkeý jáne onlaın irikteý talent.gov4c.kz saıtynda 1 naýryzdan bastap júrgiziledi.
Jobaǵa qatysýshylar irikteýdiń úsh kezeńinen ótedi. Alǵashqy ekeýinde úmitkerler logıkalyq testileý men QR zańdarynyń bilimi boıynsha test tapsyrady. Qorytyndy kezeńde memlekettik jáne qoǵam qaıratkerlerinen, HR sarapshylarynan jáne memlekettik korporasııanyń basqarma múshelerinen turatyn sarapshy keńespen áńgimelesý ótedi. Joǵary ball jınaǵan jáne áńgimelesý kezeńinen ótken úmitkerler keıinnen tıisti bos laýazymdarǵa taǵaıyndaý maqsatynda kadr rezervine alynady.