Ultyna, tiline, dinine qaramaı, ózge etnos ókilderin baýyryna basqan qazaq halqynyń darhan minezi, keńpeıil bolmysy keıingi urpaqqa úlgi dep bilemin. Adamdardyń bir-birimen qarym-qatynasy, syılastyǵy, túsinistik sııaqty qundylyqtardyń da árdaıym orny erekshe.
Bul rette Alǵys aıtý kúniniń mańyzy zor. Bul aıtýly kún elimizdegi beıbitshilik pen tatýlyqty dáripteıtin aıshyqty meıram. Alǵys aıtý arqyly adamdar arasyndaǵy túsinistik pen syılastyq nyǵaıa túsedi. Qashanda etnosaralyq kelisim – el damýynyń ózegi, el birligi – órkendeýimizdiń basty sharty bolyp qala beredi.
Meıirimdilik, qaıyrymdylyq sııaqty ıgi qasıetter qazirgi kezde de qoǵamda kórinis tabýda. Ásirese, koronavırýs indeti kezinde elimizdegi azamattar óziniń aýyzbirshiligin, tatýlyǵyn kórsetti. Bir-birine janashyr bola bildi. Máselen, respýblıkalyq «Biz birgemiz!» qaıyrymdylyq aksııasy aıasynda Jambyl oblystyq «Vynhýa» dúngender qaýymdastyǵynyń mádenı ortalyǵy 1 100 000 teńgege 120 otbasyǵa azyq-túlik sebetterin jáne 100 000 teńgege 2000 medısınalyq maska taratty. Atalǵan birlestiktiń ókili Rýslan Ismazovtyń bastamasymen Almaty qalasynda turatyn az qamtylǵan otbasylarǵa 4 500 000 teńgege 35 tonna azyq-túlik túrindegi gýmanıtarlyq kómek jiberildi. Munyń barlyǵy da qazaq jerindegi tatýlyqty, birlikti kórsetedi. Sondaı-aq elimizde bastaý alǵan «Biz birgemiz!» aksııasy aıasynda Jambyl aýdanynyń turǵyndaryna 1 000 000 teńgege 7 tonna azyq-túlik taratyldy. Osy aýdanǵa qarasty Grodekovo jáne Jalpaqtóbe aýyldaryndaǵy dúngen etnosynyń ókilderi aýyldardaǵy baqylaý beketinde turǵan medısına, áskerı jáne quqyq qorǵaý organdarynyń qyzmetkerlerine kúnine túski as uıymdastyrdy. Sonymen qatar Qordaı aýdany, Sortóbe aýylynyń ákimdigi men eriktileri birlesip, Sortóbe, Qarakemer, Aýqatty, Qarasaı jáne Eńbek aýyldaryndaǵy 305 otbasyna 1 200 000 teńgege jáne Aýqatty, Masanchı men Bular batyr aýyldaryndaǵy az qamtylǵan 72 otbasyna 220 000 teńgege qaıyrymdylyq kómek kórsetti.
Jalpy, elimizdegi bastaý alǵan árbir joba biz úshin óziniń ómirsheńdigimen, maǵynasymen qundy. Bul bastamalardyń bári de bizge memlekettiń berip otyrǵan múmkindigi. Sonymen qatar eldiń aýyzbirshiligin, tatýlyǵyn aıǵaqtaıtyn dúnıe. Bir-birine qaıyrymdylyq jasaý arqyly adam balasy ulttyń bolmysyndaǵy uly qundylyqtardy saqtap qalady. Sondaı-aq bul urpaqtar sabaqtastyǵyna da qajet dúnıe.
Elbasy Nursultan Nazarbaev pen Memleket basshysy Qasym-Jomart Toqaev eldiń áleýmettik jaǵdaıyn jaqsartý úshin barlyq múmkindikti qarastyryp keledi. Elimizdegi túrli oqıǵalarǵa baılanysty jedel sharalar qabyldap, onyń oń sheshilýine tıisti tapsyrmalar berýde. Ásirese, Qazaqstanda turatyn ózge etnos ókilderine degen qurmetteri erekshe.
Qarapaıym halyq arasyndaǵy bir-birin jaqsylyqqa shaqyrý, tatýlyqqa úndeý, beıbitshilikti nasıhattaý sııaqty úrdister bizben qatar, bolashaq urpaqqa da paıdaly dúnıe dep bilemin. Qaı kezde de adamdar bir-birin qurmettep, bir-birine alǵys aıtyp júrgen jerde eshqandaı da kelispeýshilik bolmaıdy dep oılaımyn.
Biz úshin tatýlyq pen birlikten asqan qundylyq joq. Sebebi Qazaqstan – bárimizdiń ortaq Otanymyz. Ortaq Otanymyzda beıbitshilik pen tatýlyq saltanat qurǵan kezde, árqaısysymyz osy qundylyqty ári qaraı damytýǵa, ustap turýǵa mindettimiz. Sondyqtan Alǵys aıtý kúni merekesi de eldiń yntymaǵyn arttyratyn aıtýly kúnniń biri.
Memlekettiń tutastyǵynan, adamdardyń tatýlyǵynan asqan qundylyq joq. Men de el táýelsizdiginiń máńgi, baıandy bolýyn tileımin! Qazaq eline alǵys aıtamyn! Elimizde árdaıym beıbitshilik pen tynyshtyq bolsyn! Únemi adamdarǵa alǵysymyzdy aıtyp júreıik!
Aısha IDYBO,
«Jambyl oblystyq «Vynhýa» dúngender assosıasııasynyń mádenı ortalyǵy» qoǵamdyq birlestiginiń tóraıymy