Aqtóbe qalasy men aýdandaryndaǵy burynǵy kommýnaldyq menshiktiń ıesiz qalǵan gaz, sý tasymaldaýshy jáne taratýshy jelileri tabıǵı monopolııalar sýbektileriniń qaramaǵyna senimgerlik basqarý boıynsha beriledi dep habarlaıdy Egemen.kz.
Iesiz ınjenerlik nysandar men jabdyqtardy tabıǵı monopolııalar sýbektilerine senimgerlik basqarýǵa berýdiń jol kartasyna sáıkes oblystyq energetıka jáne turǵyn úı sharýashylyǵy basqarmasy qaraýsyz qubyrlar men qudyqtardyń, elektr jabdyqtarynyń tizimin jasaýdy bastady. Oblys ákimi Ońdasyn Orazalın eń aldymen Aqtóbe qalasynyń tóńiregindegi 338 baý-baqsha ujymynyń kommýnaldyq jelilerin túgendeýdi jedeldetýdi tapsyrdy.
Qazirgi ýaqytta oblystaǵy kommýnaldyq jelilerdiń uzyndyǵy 10 690,4 shaqyrymdy qurasa, tabıǵı monopolııalar nysandarynyń menshiginde 2 182,5 km gaz, 3 505,3 km sýmen jabdyqtaý jelileri, 3 883,6 km elektr jelisi bar. Qazirgi ýaqytta menshik quqyǵy anyqtalmaǵan ınjenerlik jelilerdiń ishinde tabıǵı monopolııalar sýbektilerine beriletini 5 220,4 shaqyrym bolsa, osy kúnge deıin eshbir menshikke berilmeı ıesiz jatqan ınjenerlik jelilerdiń uzyndyǵy 135,2 shaqyrym, sonyń ishinde jylý jelisi 7,5 shaqyrym, elektr jelisi 127,7 shaqyrym jáne transformatorly qosalqy stansa 22 birlikti quraıdy.
Aqtóbe qalasynda ıesiz qalǵan jelilerdiń basym bóligi baý-baqsha ujymdaryna tıesili bolyp otyr. Eshbir sanatqa engizilmegendikten qubyrlardyń qazirgi jaǵdaıy, olardy kimderdiń paıdalanyp jatqany týraly tolyq aqparat alý múmkin emes. Qalalyq ákimdik qyzmetkerleri «Batys –1» jáne «Batys –2» yqsham aýdandaryndaǵy 64,1 shaqyrym gaz, 45,6 shaqyrym sý, 50,3 shaqyrym sý tartý, 53,6 shaqyrym elektr jelilerin tekserip shyqty. Kóktem shyǵa baý-baqsha ujymdaryndaǵy qubyrlar men jelilerdi túgendeý jumystary qaıta bastalyp, jazǵa deıin aıaqtalýy tıis.