Qostanaı oblysynda soqqan sońǵy boranda joǵalyp ketip, bir aptadan keıin Qaraǵandy oblysynyń shekarasynan tabylǵan 49 jastaǵy jylqyshy Amangeldi Turjanov edi, dep habarlaıdy Egemen.kz
Aıdalada ajal ajdahasyndaı qutyrǵan dúleı boranda janǵa pana bolarlyq yq tappaı ómir men ólimniń arasynda jantalasqan jansebil jylqyshy: «Astymdaǵy atym bolmasa, meni eshkim taba almas edi», deıdi.
20 aqpandaǵy borandy kúni aýǵan tabyn jylqynyń sońynan shyqqan jylqyshynyń ózi de iz-túzsiz joǵalyp ketti. Alty kúnge sozylǵan izdeý sharalary esh nátıje bermedi. Aqyry astanadan kómekke jetken tikushaq astyna toqym tósep, ústine qar jamylǵan Amangeldini 27 aqpan kúni ǵana tapty. Qasyndaǵy aty bolmaǵanda qar astynda jatqan jylqyshyny tikushaqtyń áýeden baıqaı qoıýy ekitalaı eken.
Qutqarýshylar Amangeldini dereý Jezǵazǵan qalasynyń aýrýhanasyna jetkizgen. Onyń óziniń aıtýynsha, qazir jaǵdaıy táýir. Palatada bir uly qasynda jatyr. Jylqyshynyń tórt uly, bir qyzy bar. Olar kún saıyn qońyraý shalyp, ákeleriniń aman qalǵanyna áli kúnge deıin sener, senbesin bilmeıtinin aıtady eken.
– Úsip ólip qalmaý úshin dene jattyǵýyn jasadym. Atym teýip-teýip qar arshyp beredi, sol jerden shyqqan shópti jedim. Sońǵy kúnderi boıdaǵy kúshim sarqylyp, kózime marqum anam elesteı beretindeı kórindi. Ata-babamyz «Attynyń nesibesi altaý» dep beker aıtpaǵan eken, meni astymdaǵy atym – Ahılles qutqaryp qaldy. Men bárinen buryn atymnyń bir sát janymnan ketpeı qoıǵanyna qatty tańǵaldym. Bir anyǵy, men Ahıllestiń arqasynda tiri qalyppyn, – dedi jylqyshy.
Ahılles qazir Úrpek mańyndaǵy qystaýda. Al Amangeldi aýrýhanadan shyǵa salysymen, qaıtadan jylqyǵa shyǵamyn, úıde otyra almaımyn, attyń qomynda, jylqynyń jalynda júrip ábden úırenip qaldyq qoı deıdi.