5-7 naýryz kúnderi Nıderlandtyń Dordreht qalasynda short-trekten álem chempıonatynyń jalaýy jelbireıdi. Aıtýly jarys barysynda sportshylar ádettegideı 500, 1 000, 1 500 jáne 3 000 metrlik qashyqtyqqa júgirip, júldelerdi ózara sarapqa salady. Sonyń qorytyndysy boıynsha kópsaıystyń jeńimpazy anyqtalady. Odan bólek, áıelder 3 000 jáne erler 5 000 metrlik estafetada baq synaıdy.
Sporttyń bul túrinen álem chempıonaty 1976 jyldan beri úzdiksiz uıymdastyrlyp keledi. Sol kezden beri 45 márte jalaýy jelbiregen jarysta eń kóp oljaǵa kenelgen komanda – Ońtústik Koreıa quramasy. Sol eldiń shorttrekshileri 221 ret jeńis tuǵyryna kóterildi. Júldelerdiń 90-y altyn, 68-i kúmis jáne 63-i qola. Ekinshi jáne úshinshi oryndardy Qytaı (64 altyn+43 kúmis+40 qola) men Kanada (61+73+61) ıelenýde. Úıeńki japyraqtary eli órenderiniń (195 medal) jeńip alǵan júldeler sany Aspanasty eli ókilderinen (147 medal) áldeqaıda kóp. Alaıda kúmis pen qolaǵa qaraǵanda altynnyń sapasy artyq bolǵandyqtan, qytaılar kanadalyqtardan ozyp otyr.
Al odan keıingi satylarǵa AQSh (16+16+30), Japonııa (13+19+21), Nıderland (9+13+9), Ulybrıtanııa (7+10+9), Italııa (5+13+20), Reseı (3+2+1), Aýstralııa (2+5+3), Majarstan (1+5+3), Bolgarııa (1+2+6), Jańa Zelandııa (1+1+0), Germanııa (0+1+1), KSRO (0+1+0), Fransııa (0+0+4) jáne Belgııa (0+0+4) quramalary jaıǵasty.
Jekelegen sportshylar jaıynda aıtar bolsaq, dúnıe júzi boıynsha osy sport túrin serik etken sańlaqtardyń úsheýi ǵana 18 márte jeńis tuǵyrynyń eń bıik satysyna kóterilgen eken. Olar – Van Men, Vıktor An jáne Iаn Iаn (A). Endi osy myqtylardy óz oqyrmandarymyzben jaqynyraq tanystyraıyq.
35 jastaǵy Van Men – Qytaıdyń Heılýnszıan provınsııasynyń týmasy. Aıtýly dodada ol 18 altynnan bólek, 9 kúmis jáne 3 qola medaldi moınyna ildi. Barlyǵy – 30 júlde. Van úlken sporttan áldeqashan qol úzgenine qaramastan áıelder arasyndaǵy saıysta onyń ornatqan rekordtarynyń birazy áli kúnge deıin murty buzylmaı tur.
Seýlde týyp-ósken Vıktor An qytaılyq Van Menmen túıdeı qurdas. Sporttyq karerasynyń negizgi bóligin ol óziniń otany – Ońtústik Koreıada ótkizse, keıinnen Reseıge qonys aýdaryp, biraz jyldan beri sol eldiń namysyn qorǵaýda. Álem chempıonatynda An 18 altyn, 7 kúmis jáne 3 qolany qanjyǵasyna baılady. Barlyǵy – 28 júlde.
44 jastaǵy Iаn Iаn (A) da Qytaıdyń Heılýnszıan provınsııasynda dúnıege keldi. Ol 1994-2005 jyldar aralyǵynda áıelder saıysynda jasyndaı jarqyrap, kóptegen bıik belesterdi baǵyndyrdy. Bul sportshynyń qorjynynda 18 altyn, 6 kúmis jáne 2 qola medal bar. Barlyǵy – 26 júlde.
Al jeńip alǵan júldeleriniń jalpy sany jaǵynan 36 jastaǵy Sharl Amlenniń aldyna túsetin eshkim joq. Kanadanyń Kvebek aımaǵyna qarasty Levı qalashyǵynyń týmasy 2005-2018 jyldar aralyǵynda 32 júlde oljalady. Onyń 9-y altyn, 13-i kúmis jáne 10-y qola. Sondaı-aq dúnıejúzilik dodada molynan oljaǵa kenelgen sportshylar qatarynda kanadalyq Sılvı Deıgl (15+3+1), Natalı Lamber (15+2+3), Marıs Perro (8+2+1), qytaılyq Fan Kesın (10+1+2), Lı Szıaszıýn (8+3+8), koreıalyq Lı Ho Sok (8+6+3), Chhve Yn Gen (8+2+3), Chın Son Iý (8+2+1) syndy short-trek sheberleri bar.
Sońǵy álem chempıonaty 2019 jyly Bolgarııanyń bas shahary – Sofııada uıymdastyryldy. Bul jarysta da Ońtústik Koreıa quramasy shashasyna shań juqtyrmaı, komandalyq saıysta jeke-dara kósh bastady. Olar 15 (8+5+2) júlde oljalady. Ekinshi orynda – Nıderland. Qyzǵaldaqtar eliniń sportshylary 5 (4+0+1) márte jeńis tuǵyryna kóterildi. Sondaı-aq Qytaı (0+3+1), Kanada (0+2+3), Reseı (0+2+3), Majarstan (0+0+1) jáne Japonııa (0+0+1) ókilderiniń de qanjyǵalary maılandy. Jekelegen shorttrekshiler arasynda Bolgarııada erler arasynda koreıalyq Lım He Djýn (5+0+0) jáne áıelder saıysynda nıderlandtyq Sıýzanne Shıýltıngtiń (3+0+1) baq juldyzdary jandy.
Qazirgi kezde sporttyń bul túri Qazaqstanda jaqsy damyp keledi. Olımpııa oıyndary men álem chempıonattarynda jerlesterimiz jeńis tuǵyryna synyq-súıem qalǵanda súrinip júr. Esesine álem kýbogy jolyndaǵy jarystarda jasyndaı jarqyrap júrgen jigitterimiz jeterlik. Eń qýanyshtysy, bilikti bapker Mádiǵalı Qarsybekov jattyqtyratyn ulttyq komandamyzdyń negizin óz qandastarymyz quraıdy. Erteń Nıderlandta jalaýy jelbireıtin jarysta Qazaqstannyń namysyn segiz sportshy quraıdy. Olar – Madına Janbosynova, Iаna Han, Abzal Ájiǵalıev, Denıs Nıkısha, Ádil Ǵalıahmetov, Mersaıd Jaqsybaev jáne Erkebulan Shamuhanov. Bizdiń órender osy álem chempıonaty qarsańynda Reseıde oqý-jattyǵý jıynyn ótkizip, Qyzǵaldaqtar eline jaqsy babynda jáne kóterińki kóńil-kúımen attandy. Endi biz jerlesterimizden jeńis kútemiz.