Qaraǵandy oblysynyń Shet aýdanyndaǵy Aqsý-Aıýly kentiniń mańynda «Gazel» men qalaaralyq avtobýs soqtyǵysty. Jaraqat alǵan úsh adam oqıǵa ornynda kóz jumdy, dep habarlaıdy Egemen.kz
5 naýryzda túngi saǵat 1-ler shamasynda Qaraǵandy oblysynyń Shet aýdanyndaǵy Aqsý-Aıýly kentinen 30 shaqyrym qashyqta «Almaty-Ekaterınbýrg» avtojolynda «Gazel» avtokóliginiń 34 jastaǵy júrgizýshisi qarsy betke shyǵyp ketip, «Taraz-Nur-Sultan» baǵytymen kele jatqan 56 jastaǵy júrgizýshiniń basqarýyndaǵy «VAN HOOL» markaly avtobýspen soqtyǵysqan.
«Jol apaty saldarynan «Gazel» avtokóliginiń júrgizýshisi men 24 jastaǵy jolaýshysy, sondaı-aq 37 jastaǵy avtobýstyń ekinshi júrgizýshisi alǵan jaraqatynan oqıǵa ornynda kóz jumdy. Jol apaty kezinde avtobýsta tórt jolaýshy bolǵan», dep habarlady Qaraǵandy oblysy PD baspasóz qyzmeti.
Atalǵan fakti boıynsha Qylmystyq kodekstiń 345-baby 4-bóligi boıynsha qylmystyq is tirkeldi. Tıisti saraptamalar taǵaıyndaldy, tergeý júrgizilip jatyr. Qaraǵandy oblysynyń polısııa departamenti júrgizýshilerge jol qozǵalysy erejesin saqtaýdy jáne jyldamdyqty asyrmaýdy eskertedi.