Muhambetqalı Dúısembaev týyndylarynyń ózegi – aýyl taǵdyry. Araldyń ekologııalyq ahýalyn qalamyna arqaý etken sýretshi shyǵarmalarynyń bir parasy ólkeniń ótkeni men búgingi kórinisin aıshyqtaıdy.
Almaty mýzeıinde ashylǵan «Kesteli tarıh – syrly álem» sándik-qoldanbaly óner kórmesine Qazaqstan Sýretshiler odaǵynyń múshesi, «Shabyt» halyqaralyq festıvaliniń laýreaty, Oral Tańsyqbaev atyndaǵy Almaty sándik-qoldanbaly óner kolledjiniń oqytýshysy Muhambetqalı Dúısembaevtyń qalamynan týǵan 30-ǵa jýyq shyǵarma qoıylypty. Kórmege kelýshilerdiń nazary sýretshi shyǵarmalarynyń áleýmettik sıpatyna ǵana emes, gobelende kórkem úılesim tapqan túrli-tústi obrazdarǵa aýatyny anyq. Cýretshiniń «Jer ana shaqyrady», «Aral serııalary» ekologııalyq apatty óńirdiń tynys-tirshiligine arnalǵan. Qııaly ushqyr qylqalam sheberi úshin jyldyń qaı mezgili bolsyn tartymdy desek, «Balalyq shaq», «Tekemet basý», «Jas kelin», «Jaılaý», «Sheber ana», «Kórshi», «Tulyp» sııaqty týyndylaryndaǵy kók boıaýǵa qanyq keń dalanyń kórinisi kóktemniń kelgenin ańǵartqandaı.
О́nertanýshylar Muhambetqalı Dúısembaev shyǵarmalaryn birneshe salaǵa bólip qarastyrady. Mysaly, «Atan», «Balalyq shaq», taǵy basqa da týyndylary sıýrealızmge negizdelse, «Jaılaýda», «Jas kelin», «Sheber ana», «Tekemet basý» sııaqty jumystarynan lırıka esedi. Jaıma-shýaq aýyl kórinisi sýrettelgen «Jaılaý» týyndysy kókke oranǵan ólkeni kóz aldyńyzǵa ákelse, «Torsyq ustaǵan qyz», «Qyzǵaldaq» jumystarynda sýretshiniń oı-qııaly sharyqtaı beredi. Kúrdeli boıaý kómeski tartpaı taqyrybymen úndese ketken taǵy bir shyǵarmasy «Arý» dekoratıvtik abstraksııada oryndalyp, gobelende Turan arýynyń obrazy aıshyqtalady. Arýdyń sulýlyǵy, batyrlyǵy kórkem úılesim taýyp, obrazdy asha túskendeı. Aıshyqty kolorıstıkasymen erekshelenetin «Meniń Qazaqstanym» shyǵarmasy el táýelsizdigine arnalsa, sýretshiniń kenep betindegi portretter serııasy óz alynda úlken taqyryp dep aıtýǵa bolady.
«Ájem Balǵynnyń ónegesin kórip óstim. Tekemet basý, alasha toqý sııaqty ulttyq qolónerimizdiń ozyq ádisteriniń shyǵarmashylyǵymda kórinis tabýy sondyqtan da bolar», deıdi qylqalam sheberi.
Kenep betinde túrli-tústi obrazdardyń órnektelýiniń ózindik tehnıkasy ǵana emes, dástúrimizben ushtasyp jatqan tereń máni bar. Búginde elimizdiń ońtústik, soltústik óńirlerinde saqtalyp qalǵan toqyma óneri – ultymyzben birge jasasyp kele jatqan kıeli óner. Kezinde Almatydaǵy kilem fabrıkasy gobelenshiler úshin sapaly jipterdiń óndirisi sanalsa, qazirgi kezde qoldan ıirip óndiriske engizýdiń ózindik mashaqaty bar, ıaǵnı tabıǵı jipten toqylǵan kartınalar uzaq saqtaýǵa kelmeıdi. Sondyqtan da osy toqyma ónerinde qoldanylatyn boıaýlar men jipterdi Reseı, О́zbekstan, Qyrǵyzstan jáne Qytaı elinen alýǵa týra keledi.
Qazaq beıneleý óneriniń qara shańyraǵy ári shyǵarmashylyqtyń ustahanasy sanalatyn Oral Tańsyqbaev atyndaǵy Almaty sándik-qoldanbaly óner kolledjinen 80 jyldan astam ýaqytta elimizdiń óneri men mádenıeti salasyna kóptegen kásibı maman qanat qaqty. Búgingi kúni de jastar arasynda beıneleý ónerine qushtar talapty jastar kóp. Eń bastysy – Muhambetqalı Dúısembaev atap ótkendeı, tabıǵaty ónerge jaqyn talanttardy tanı bilý.
ALMATY