Jeksenbide fýtboldan Qazaqstan chempıonatynyń tórt oıyny ótýge tıis edi. Alaıda aýa-raıynyń qolaısyzdyǵyna baılanysty Shymkenttiń «Ordabasy» jáne Petropavlovskiniń «Qyzyljar» klýbtary arasyndaǵy match keıingi shegerildi, dep habarlaıdy Egemen.kz.
Premer-lıgaǵa qaıta oralǵan «Aqtóbe» Aqtaýda «Kaspııge» qarsy oınady. Birinshi taımda esep ashylmaǵanymen, úzilisten soń alańǵa endi ǵana shyqqan fransııalyq legıoner Ýadjdı Salı 52-mınýtta aıyp dobyn keremet oryndap, jergilikti jankúıerlerdi qýantty. Alaıda kóp uzamaı Maksım Fedın 11 metrlik núkteden nysanany dál kózdep, tarazy basyn teńestirdi. Esep – 2:2.
Qostanaıda «Tobyly» Oraldyń «Aqjaıyǵyn» qabyldap, qonaqtar qaqpasyna jaýapsyz eki dop saldy – 2:0. Bul goldardyń avtorlary – Azat Nurǵalıev (30-mınýt) pen Ashat Taǵybergen (75-mınýt).
Al Qyzylorda «Qaısar» men «Taraz» arasyndaǵy matchtyń birinshi kezeńinde bes gol soǵyldy. Eldos Ahmetov (5-mınýt) pen Maqsat Baıjanov (22-mınýt) qatarynan eki márte nysanany dál kózdegennen keıin kórermender qonaqtar endi es jııa almaıtyn shyǵar dep oılady. Biraq olar tym erte qýanǵan eken. Úziliske shyqqanǵa deıin Abzal Taýbaı (25-mınýt), Abylaıhan Jumabek (36-mınýt) jáne Baýyrjan Baıtana (45-mınýt) mergendik tanytyp, «Tarazdy» alǵa shyǵardy – 2:3. Kezdesýdiń sońyna deıin bul esep ózgergen joq.