Aqpannyń at qulaǵy kórinbeıtin dúleı borandarynyń birinde Soltústik Qazaqstan oblysynyń Uıaly aýyldyq okrýginiń 28 turǵyny «Maı-Uıaly» trassasynda kólikpen kele jatyp, aıdalada qar qursaýynda qalady. О́rkenıettiń joǵary satysy óziniń ozyqtyǵyn barlyq jerde kórsetedi ǵoı. Eger osy kisiler osydan bar bolǵany jıyrma jyl buryn osyndaı qursaýda qalsa, ajal qushar edi. О́ıtkeni ústerinen júrip ketken boran olardy kórsetpeı tastaǵan. Qazir jurttyń bárinde telefon bar jáne onymen qaı jerden habarlasyp turǵanyn da anyqtaýǵa bolady.
Qursaýdaǵy jandar tótenshe jaǵdaı qyzmetine, aýyl ákimine, polısııa bólimine qaıta-qaıta habarlasyp, ózderin qutqarýdy ótingen. Árıne, bul qyzmetter de túk kórinbeıtin boranda qursaýdaǵylarǵa tez jetip, qutqara qoımaıdy. Tek arada 12 saǵat ótkende ǵana Aqjar aýdandyq tótenshe jaǵdaı bóliminiń qyzmetkerleri S.Qalıev, M.Ǵabdysálám jáne V.Matveev qardy jaryp ótetin qýatty tehnıka «TREKOL-men» qursaýda qalǵandarǵa jetedi. Túk kórinbeıtin boranda jáne tún jarymynda qar astynda qalǵandarǵa barynsha aqyryn barmasa jáne qıyn. О́ıtkeni aýyr mashına jeńil kólikterdi zaqymdap ketýi de múmkin. Biraq qutqarýshylardyń sheberliginiń, kásibı daıyndyqtarynyń joǵarylyǵynyń arqasynda qursaýdaǵy azamattar qutqaryldy.
Qutqarýshylar úsýge taıap, ábden tońyp, dirildegen jandardy evakýasııalyq tirekke jetkizip, aýyzdaryn jylytyp ystyq shaı men tamaq berip, boılaryna qan júgirtedi. Tipti osynda qondyryp, tek boran basylǵan soń, erteńine jolǵa salyp jiberedi. Sheksiz alǵystaryn jaýdyrǵan júrginshiler sóıtip ajal aýzynan aman qalyp, úılerine jetedi.
Al Uıaly aýyldyq okrýginiń ákimi Ǵ.Káribaev óziniń úlken alǵysyn Soltústik Qazaqstan oblystyq Tótenshe jaǵdaılar departamentiniń bastyǵy Ramıl Kamalovqa hatpen jetkizip, qutqarýǵa qatysqan azamattardyń isterin atap ótýdi ótingen. «Eger osy azamattar óz isterine adaldyqty, joǵary sheberlik pen kásibı daıyndyqtyń bıiktigin kórsetpese búgingi tańda Uıaly aýyldyq okrýginde qanshama otbasy qan jutyp, qaıǵy shegip otyrar edi. Sizdiń qyzmetkerlerińiz olarǵa ekinshi ómir syılaǵandaı boldy. Sondyqtan biz olardyń erlikteriniń aldynda bas ıemiz jáne olardyń eńbegin laıyqty atap ótýdi ótinemiz» delingen eken hatta.
Osyǵan uqsaıtyn alǵys hattardy bıylǵy aqpanda Soltústik Qazaqstan oblystyq TJ departamenti kóp aldy. О́z isine alǵys alǵanǵa ne jetsin?!
Soltústik Qazaqstan oblysy