Osy jyldyń 11 naýryz kúni saǵat 11.30 shamasynda uıaly telefonnan Aral aýdandyq №3 órt sóndirý bólimine qońyraý shalynyp, «Ǵımaratta bomba bar» degen habarlama túsken. Qońyraý shalýshynyń uıaly baılanys nómiri anyqtalǵan. Qazir atalǵan derek boıynsha is qozǵalyp, tekserý jumystary júrgizilýde, dep habarlaıdy Egemen.kz.
– Oqıǵa oryn ala salysymen terrorızmge qarsy is-qımyl salasy boıynsha jedel izdestirý sharalary júrgizildi. Nátıjesinde «jalǵan terrorızm» týraly habar túsirýshi Aral qalasynyń turǵyny, 2012 jyly týǵan, 3-shi synyp oqýshysy ekeni anyqtaldy. Jalpy mundaı qylmystar QR Qylmystyq kodeksiniń 273-babynda qarastyrylǵan. Iаǵnı jalǵan aqparat taratqan adam 6 jylǵa deıin bas bostandyǵynan aıyrylyp jáne tekseris jumystaryna tartylǵan memlekettik organdardyń materıaldyq shyǵynyn óteýi múmkin, – dedi oblystyq polısııa departamentiniń ekstremızmge qarsy is-qımyl basqarmasynyń orynbasary Qýanysh Orazov.
– Jalpy «jalǵan terrorızm» týraly habarlama taratý qylmystyń aýyr túrine jatady. Sondaı-aq, zańǵa sáıkes, kámeletke tolmaǵandardyń jasaǵan áreketi úshin onyń ata-anasy jaýapkershilikke tartylady. Bireýlerge mundaı áreketter balanyń oıyny, esh zııany joq bolyp kórinýi múmkin. Biraq túsken aqparatty oıyn dep eseptep, tıisti sharalar atqarylmaı qalsa, onyń sońy adam shyǵyny, basqa da materıaldyq zalaldarǵa ákelip soǵýy múmkin. Ári jalǵan aqparat taratýshyny tabý úshin de quzyrly organdar belgili bir materıaldyq-tehnıkalyq, qarajatty jáne jumys ýaqytyn shyǵyndaýǵa májbúr bolady, – dedi oblystyq jumyldyrý daıyndyǵy basqarmasynyń basshysy Medet Ýsaın.
Aıta keteıik, oblysta mundaı jalǵan aqparat berý sońǵy ret úsh jyl buryn tirkelgen.