Koronavırýs ınfeksııasynyń taralý qaýpi jóninen Batys Qazaqstan oblysy 16 naýryz kúni «qyzyl aımaq» qataryna endi dep habarlaıdy Egemen.kz
Oblysta indet juqtyrǵandar men qaıtys bolǵandar sany artyp barady. 16 naýryz kúngi málimet boıynsha sońǵy táýlikte 51 adam indet juqtyrǵan. Al jalpy osy dertten qaıtys bolǵandar sany 219-ǵa jetti. Osyǵan oraı óńirde karantın talaptary kúsheıtiletini oblys ákimi Ǵalı Esqalıevtiń tóraǵalyǵymen ótken shtab otyrysynda habarlandy.
- Jyl basynan beri oblysta KVI-ge 4657 adam shaldyqsa, 50 adam koronavırýs indetinen qaıtys boldy. Naqtyraq aıtsaq, qańtarda 28 adam, aqpanda - 15, naýryzda jeti adam qaıtys bolyp otyr. Indet juqtyrǵandardyń 34 paıyzy – 80 jastan asqandar, 28 paıyzy – 40-65 jas aralyǵyndaǵylar bolsa, 24 paıyzy – 65-80 jas aralyǵyndaǵylar. KVI-ge shaldyqqandardyń deni Oralda, odan keıin Bórli, Báıterek, Terekti aýdandarynda tirkelip otyr. Aýrý oshaǵy – negizinen indet juqtyrǵan otbasylar, qoǵamdyq kólikter, jumys oryndary men saýda úıleri, otbasylyq sharalar. Úshinshi toqsan bastalǵaly 334 oqýshy koronavırýs juqtyrǵan, - deıdi Batys Qazaqstan oblystyq sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev.
Búginde oblysta juqpaly aýrýlardy emdeıtin 7 stasıonar, 13 PTR zerthanasy bar. О́ńirdegi densaýlyq saqtaý basqarmasy basshysynyń mindetin atqarýshy Arman Qalıbekovtyń aıtýynsha, oblysqa 4 naýryzda 6500 dozadan turatyn vaksınany ekinshi partııasy jetkizilgen. Jalpy 1 aqpannan beri oblysta medısına salasynyń 2210 qyzmetkeri, 322 pedagog, kúshtik qurylymdardyń 40 ókili ekpe alyp úlgerdi. «Vaksınalaý kún saıyn, barlyq aýdanda júrip jatyr» dep habarlaıdy densaýlyq saqtaý basqarmasynyń baspasóz qyzmeti.
Sońǵy málimetterge qaraǵanda, óńirdegi ınfeksııalyq 7 stasıonardaǵy jalpy tósek sany 591 bolsa, búginde onda 275 naýqas em alýda. Iаǵnı kereýetterdiń 53,5%-y bos. Karantındik stasıonarlarda 38 adam bar. Jansaqtaý bólimderinde 16 naýqas jatyr. Oblys boıynsha ınfeksııalyq aýrýhanalarda – 1221, karantındik stasıonarlarda – 765 kereýet rezervte tur.
Naýryzdyń 16-sy kúngi málimet boıynsha osy oqý jylynda oqýshylar jáne balabaqsha tárbıelenýshileri arasynda 563 oqıǵa tirkelipti. Máselen, ótken jyldyń qyrkúıek aıynda – 4, qazanda – 5, qarasha aıynda – 102, jeltoqsanda – 78 oqýshy koronavırýs juqtyrǵan. Mektepke deıingi uıymdardan 16 búldirshin aýyrǵan. Al 2021 jyl bastalǵaly vırýs juqtyrǵan oqýshylardyń sany 358-ge jetken.
Iri óndiris oryndaryndaǵy ahýal da qatań baqylaýda. Máselen, «Jaıyq Munaı» mekemesinde 2020 jyl boıyna koronavırýs juqtyrǵan 61 oqıǵa tirkelse, olardyń bári de vahtaǵa kirer aldyndaǵy tekseris kezinde anyqtalǵan eken. Al bıylǵy qańtardan beri munda taǵy 35 adamnan vırýs anyqtaldy. Ken ornynda qyzmet etip júrgen jumysshylar arasynan vırýs shyqqan joq.
Qarashyǵanaq Petroleým Opereıtıng kompanııasynda da 2020 jyly qaýipti vırýs juqtyrǵan qyzmetkerler sany 86-ǵa jetken bolatyn. Al bıyl jańa jyl bastalǵaly 48 oqıǵa tirkelgen. Onyń 16-sy – vahtaǵa kirer aldynda, 12-si – vahta kezegi aıaqtalǵan kezde anyqtalsa, 20 adam jumys ýaqytynan tys júrgen kezinde tekserilip, vırýs juqtyrǵany belgili bolǵan.
Oral qalasynyń ákimi Abat Shynybekov óńirdiń qyzyl aımaqqa enýine baılanysty qoǵamdyq tamaqtaný oryndarynyń jumys kestesin keshki 22.00. saǵatqa deıin shekteýdi usyndy. Al oblys basshysy Ǵalı Esqalıev alda kele jatqan mereke kezinde kópshilik sharalardy barynsha shekteýdi tapsyrdy.
18 naýryz kúni Batys Qazaqstan oblystyq sanıtarlyq-epıdemıologııalyq baqylaý departamenti basshysy, oblystyń bas sanıtary Muhamǵalı Aryspaevtyń jańa qaýlysy shyǵatyny belgili boldy. Eger óńir «qyzyl aımaqtan» shyqpasa, karantındik sharalardyń kúsheıetini anyq.
Batys Qazaqstan