Tashkentte ótken Grand Slam týrnırinen keıin álemdik reıtıng qaıta jańartyldy. Sol jarysta 60 kılo salmaq dárejesinde kúresip, kúmis medaldi ıelengen Rıo Olımpıadasynyń kúmis júldegeri, álem jáne qurlyq chempıony, Azııa oıyndarynyń jeńimpazy Eldos Smetov myqtylar tiziminde úsh satyǵa joǵarylady. Qazirgi kezde ol ekinshi oryndy ıelenýde. Ázirge Qazaqstannyń dzıýdo kúresi sheberleri arasyndaǵy eń úzdik nátıje osy.
Maqtaýly Eldos Smetovten bólek, taǵy bir qandasymyz «TOP-10» dzıýdoshynyń qataryna enip otyr. Ol – Gusman Qyrǵyzbaev. Atalǵan balýan da asa jeńil salmaqta óner kórsetedi. Gusman О́zbekstandaǵy týrnırge qatysqan joq. Biraq soǵan qaramastan álemdik reıtıngtegi 10-ornyn saqtap qaldy. Sol sekildi 66 kılo salmaq dárejesinde de qazaqstandyq tatamı sheberleriniń oryndary ózgerissiz qalyp otyr. Atap aıtsaq, qazirgi kezde Erlan Serikjanov 11-oryndy ıelense, Eldos Jumahanov 25-satyǵa jaıǵasqan.
Esesine 73 kılo salmaq dárejesindegi jaǵdaıymyz jaqsardy. Betke ustar balýanymyz Jansaı Smaǵulov Tashkentte óte tamasha óner kórsetkeni ózderińizge málim. Ulybrıtanııa, Shveısarııa jáne О́zbekstannyń ókilderin jolynan ońaı yǵystyrǵan ol jartylaı fınalda armenııalyq Ferdınand Karapetıandy qapy qaldyrdy. Aqtyq aıqasta tóreshiniń óreskel qateligi saldarynan mońǵolııalyq Send-Ochırın Sogtbaatarǵa jol berdi. Sóıtip, Jansaı kúmis medaldi qanaǵat tutýǵa májbúr boldy. Desek te fınalǵa deıin jetkeniniń arqasynda ol úzdikter tiziminde birden bes satyǵa joǵarylady. Bul kúnderi Smaǵulov 14-oryndy enshileýde.
Tashkenttegi týrnırde 81 kılo salmaqta eki jerlesimiz kúsh synasty. О́kinishke qaraı, ekeýiniń de joly bolmady. Rýslan Musaev ekinshi aınalymda súrinse, Dıdar Hamza úshinshi kezeńde jer sıpap qaldy. Qazirgi kezde álemdik reıtıngte Dıdar 27-orynda tursa, Rýslan 45-satyǵa turaqtady. Árıne, bul kóńil kónshiterlik nátıje emes. Eger jerlesterimizdiń jaz aılarynda Japonııaǵa baryp, Olımpııa oıyndarynyń kórigin qyzdyrsaq degen jospary bolsa, onda dereý namysty qamshylap, irikteý syndarynda barynsha nátıjeli óner kórsetýge talpynýlary qajet.
90 kılo salmaqtaǵy Islam Bozbaevtyń da nátıjesi birte-birte nasharlap keledi. Qazir ol 19-oryndy mise tutýda. Al alyptarmen aıqasyp júrgen nar tulǵaly jigitterimizdiń halderi tipten múshkil. Búgingi tańda 100 kılo salmaqtaǵy Aıbek Serikbaev 52-orynda tursa, +100 kılo salmaqtaǵy Erasyl Qajybaev 37-satyǵa jaıǵasqan. Árıne, dál osyndaı qarqynmen olardyń Japonııaǵa jete almaıtyny anyq.
Baıyptap qarasańyzdar, qazirgi kezde Japonııa quramasynyń qarqyny óte kúshti. Kúnshyǵys eliniń alty balýany álemdik reıtıngte «TOP-5» balýannyń qataryna enip otyr. Olardyń ekeýi myqtylar kóshin bastap tur. Grýzııanyń bes dzıýdoshysy dál sondaı qurmetke bólenip otyr. Qap taýy qyrandary arasynda bir kóshbasshy bar. Sondaı-aq Reseı, Nıderland jáne Izraıldiń de aıaqalysy qýantady. Bul memleketterdiń árqaısysynan úsh balýannan úzdik bestiktiń qatarynda.
Dál osy tusta bizge de namysty qamshylaý qajet. О́ıtkeni dál qazirgi kezde Eldos Smetov, Ǵusman Qyrzyzbaev, Erlan Serikjanov jáne Jansaı Smaǵulovtyń ǵana óneri kórermender kóńilinen shyǵýda. Orta salmaqtaǵy balýandarymyzdyń jaǵdaıy ortasha. Olardyń da mardymdy óner kórsete almaı júrgenine biraz ýaqyt boldy. Al aýyr jáne asa aýyr salmaqtaǵy jigitterimizdiń nátıjesi óte tómen. Eger jýyq arada osy kemshilikterdi túzemesek, onda Tokıo tatamıinde Qazaq eliniń sanaýly ǵana dzıýdoshylaryn kóretinimiz anyq.
Erler arasynda álemdik reıtıngtiń úzdik bestigi
60 kılo: 1.Rıýdzıý Nagaıama (Japonııa), 2.Eldos Smetov (Qazaqstan), 3.Robert Mshvıdobadze (Reseı), 4.Naohısa Takato (Japonııa), 5.Sharafýtdın Lýtfýllaev (О́zbekstan).
66 kılo: 1.Manýel Lombardo (Italııa), 2.Vaja Margvelashvılı (Grýzııa), 3.Hoshıro Marýıama (Japonııa), 4.An Baýl (Ońtústik Koreıa), 5.Barýsh Shmaılov (Izraıl).
73 kılo: 1.Soıtı Hasımoto (Japonııa), 2.Rýstam Orýdjev (Ázerbaıjan), 3.An Chang Rım (Ońtústik Koreıa), 4.Tohar Býtbýl (Izraıl), 5.Artýr Margelıdon (Kanada).
81 kılo: 1. Mattıas Kass (Belgııa), 2.Sagı Mýkı (Izraıl), 3.Tato Grıgalashvılı (Grýzııa), 4.Vebat Álbaıraq (Túrkııa), 5.Frank De Vıt (Nıderland).
90 kılo: 1.Nıkoloz Sherazadıshvılı (Ispanııa), 2.Noel van ’t End (Nıderland), 3.Lasha Bekaýrı (Grýzııa), 4.Fılıppe Sılva Morales (Kýba), 5.Nemanıa Maıdov (Serbııa).
100 kılo: 1.Varlam Lıpartelıanı (Grýzııa), 2.Peter Palchık (Izraıl), 3.Mıhael Korrel (Nıderland), 4.Jorje Fonseka (Portýgalııa), 5.Nııaz Ilııasov (Reseı).
+100 kılo: 1.Lýkash Krpalek (Chehııa), 2.Inal Tasoev (Reseı), 3.Gýram Týshıshvılı (Grýzııa), 4.Hısaıoshı Harasava (Japonııa), 5.Kokoro Kageýra (Japonııa).