Premer-Mınıstr Asqar Mamın balalardy mektepke deıingi tárbıemen qamtý josparlarymen bólisti, dep habarlaıdy Egemen.kz Batys Qazaqstan oblysy ákiminiń baspasóz qyzmetine silteme jasap.
«Jan basyna shaqqandaǵy qarjylandyrý ádistemesine sáıkes mektepke deıingi bilim berýdi jetkilikti qarjylandyrý týraly máseleni sheshýge qatysty sizderdiń depýtattyq saýaldaryńyzǵa mynalardy habarlaımyn. Búgingi tańda respýblıka boıynsha 3 jastan 6 jasqa deıingi balalardy mektepke deıingi bilimmen qamtý 98,7% - dy quraıdy. Bul kórsetkishti 2025 jylǵa qaraı 100% - ǵa deıin jetkizý josparlanyp otyr. 2020 jyly respýblıkada 38 myń oryndyq 365 jekemenshik balabaqsha ashyldy. Sondaı – aq 2 jastan 6 jasqa deıingi balalardy mektepke deıingi bilimmen qamtýdy 2025 jylǵa qaraı 95% - ǵa deıin jetkizý josparlanýda (búginde 2 jastan 6 jasqa deıingi balalardy qamtý-71,2%)», dep jazdy Asqar Mamın depýtattyq saýalǵa bergen jaýabynda.
Onyń aıtýynsha, osy maqsatta Úkimet óńirlerdiń aldyna memlekettik bilim berý tapsyrysyn ornalastyrý, vaýcherlik qarjylandyrýdy engizý jáne mektepke deıingi tárbıe uıymdarynyń balamaly nysandary arqyly jeke balabaqshalar jelisin damytý mindetin qoıdy.
«2021 jyly 32 myńǵa jýyq jańa oryn ashý josparlanǵan, onyń ishinde Almaty oblysynda – 8000 oryn, Túrkistan oblysynda – 4000 oryn. 2025 jylǵa qaraı 278 myńnan astam jańa oryn paıdalanýǵa beriledi. Ádistemege sáıkes 10,5 saǵattyq bolý rejımi bar toptar úshin jan basyna shaqqandaǵy normatıvtiń ortasha mólsheri 38 256 (qala) jáne 41 053 (aýyl), túzetý toptary úshin 67 508 (qala) jáne 74 125 (aýyl) quraıdy. Jan basyna shaqqandaǵy normatıvke eńbekaqy tóleý qoryna, oqý materıaldaryna, Kórneki quraldar men oıynshyqtarǵa, Kommýnaldyq qyzmetterge, baılanys jáne ınternet qyzmetterine aqy tóleýge, ǵımarattardy ustaý men olarǵa qyzmet kórsetýge jáne t.b. shyǵystar engizilgen», dep túıindedi Premer-Mınıstr.