Ál-Farabı Qazaq ulttyq ýnıversıtetinde ótken «Barmanqulov oqýlary» aıasynda «HHI ǵasyrdyń jańa medıa-landshafty» baıqaýy máresine jetti, dep habarlaıdy Egemen.kz
Jýrnalıstıka fakýlteti usynǵan málimetterge súıensek, Qazaqstandaǵy teleradıo jýrnalıstıkanyń negizin salýshy, jýrnalıstıka ǵylymı mektebiniń negizin qalaǵan, ulttyq teleradıo habarlaryn taratýǵa úlken úles qosqan, qazaqstandyq jýrnalısterdiń birneshe býynyn tárbıelegen ǵalym, professor Marat Barmanqulovty eske alýǵa arnalǵan konferensııa barysynda baıqaý jeńimpazdary marapattaldy.
Bıyl 20-shy ret ótip otyrǵan baıqaý stýdentter men jas ǵalymdardyń ǵylymı izdenisin arttyrýǵa, teleradıojýrnalıstıka baǵytyndaǵy shyǵarmashylyq oılary men jańasha ıdeıalaryn júzege asyrýǵa yqpal etedi. «Qazaqstan Respýblıkasynyń táýelsizdigine 30 jyl» taqyrybyndaǵy úzdik materıal, telesıýjet, aýdıorolık, baspasóz materıaly, ǵylymı jumys nomınasııalary boıynsha baıqaý jeńimpazdary qatarynda Qyrǵyzstannan Júsip Balasaǵyn atyndaǵy Qyrǵyz ulttyq ýnıversıtetiniń jýrnalıstıka fakýlteti, A.Baıtursynov atyndaǵy Qostanaı óńirlik ýnıversıteti Jýrnalıstıka jáne kommýnıkasııalyq menedjment kafedrasy, M.Áýezov atyndaǵy Ońtústik Qazaqstan ýnıversıtetiniń memlekettik tildi oqytý kafedrasy, sondaı-aq Turan ýnıversıteti, ál-Farabı Qazaq ulttyq ýnıversıteti stýdentteriniń jumystary ataldy. Bir ereksheligi mektep oqýshylary da baıqaýǵa qatysyp, baq synaýǵa múmkindik aldy. Solardyń biri Qyzylorda oblysy Shıeli aýdany №244 Y.Jaqaev atyndaǵy orta mektebioqýshysy Aıbek Berikbolulynyń jumysyn erekshe atap ótken jón.
Marat Barmanqulov - Qazaqstan Jýrnalıstıka akademııasynyń akademıgi, kórnekti ǵalym, telejýrnalıst, jýrnalıstıka jáne buqaralyq kommýnıkasııa, mádenıettaný, túrkologııa boıynsha kóptegen kitaptardyń avtory. Sonymen birge elimizde ınternettiń paıda bolýy men onyń elektrondy aqparat quraldaryna, qoǵam damýyna áserin zerttegen alǵashqy qazaqstandyq zertteýshi bolyp tabylady.
Ǵalym ómiriniń sońǵy jyldary Eýrazııany, túrkologııany zerttedi. Ǵalymnyń eńbekteri ǵylymı izdenisteriniń, ómirdiń máni týraly tereń oılarynyń nátıjesi ispetti.
Ol respýblıkada jýrnalıst kadrlaryn daıarlaýǵa úlken úles qosty. M.K.Barmanqulovtyń mektebinen ótken S.Ahmetova, G.J.Ibraeva, S.H.Barlybaeva, Sh.I.Nurǵojına, K.Qabylǵazına, Q.Tursyn, A.A.Moldabekov, Sh.Nurjanova, D.Shorohov, G.Baıkenova jáne basqalar búginde elimizge tanymal ǵalymdar ǵana emes, ǵylymı mekteptiń negizin qalaýshylar. Jańa ıdeıalardyń, jobalardyń, kitaptardyń, konferensııalardyń generatory bola bilgen zertteýshi, tálimger, oqytýshy, shyǵarmashyl tulǵa Marat Barmanqulovtyń shákirtteri búginde ustaz murasyn ónege tutady.