Ulystyń uly kúni Naýryz merekesiniń onkúndigi aıasynda Shymkentte dástúrli án sherýi ótti. Konsertke elimizge tanymal dástúrli ánniń maıtalmandary qatysty, dep habarlaıdy Egemen.kz
Olardyń qatarynda Qazaqstannyń eńbek sińirgen qaıratkeri, «Daryn» memlekettik jastar syılyǵynyń laýreaty, jyrshy, termeshi Aıgúl Elshibaeva, Qazaqstannyń eńbek sińirgen qaıratkeri Ardaq Balajanova, Qazaqstannyń eńbek sińirgen qaıratker, «Qurmet» oreniniń ıegeri Klara Tólenbaeva, Medet Salyqovtar bar.
Merekege Shymkent qalasy ákiminiń birinshi orynbasary Shyńǵys Muqan qatysty.– Halyqtyń suranysy boıynsha Shymkentte dástúrli ónerge degen suranys artýda. Onyń bir dáleli retinde keshegi kúni qalamyzda ashylǵan «Qarataý» dástúrli ulttyq óner mektebin ataýǵa bolady. Mektepte aıtys, terme, jyrdan bastap ulttyq ónerimizge deıin dáripteledi. Búginge keshke sanıtarlyq talaptarǵa sáıkes, 100 adamnan artyq kórermen qatysýǵa bolmaıdy. Degenmen telenusqasyn kórermenge usynatyn bolamyz, – dedi Shyńǵys Jumabekuly.
Keshte dástúrli ánshiler Aqtamberdi jyraýdyń tolǵaýy, Súgir, Estaı, Shashýbaıdyń jyr-termeleri men halyq ánderin shyrqap, kórermenniń ystyq yqylasyna bólendi.