Túrkııanyń Ystanbul qalasynda máresine jetken júzýden eresekter men jastar arasyndaǵy halyqaralyq týrnır qazaqstandyq sportshylar úshin tabysty aıaqtaldy.
Olımpıada aldyndaǵy oqý-jattyǵý jıyndary aıasynda ótken baıraqty básekede bizdiń sportshylar 11 medal jeńip aldy. Atap aıtar bolsaq, Dmıtrıı Balandın 50, 100 jáne 200 metrge brass ádisimen júzýde top jarsa, 50 metrge batterflaı jarysynda kúmis júldeni qanaǵat tutty. Al osy ádispen 100 metrge júzýde Ádilbek Mýsın tuǵyrdyń bıik satysynan kórindi. Sonymen qatar ol 50 jáne 100 metrge júzýde kúmis júldeni jeńip aldy. 50 metrge erkin ádispen júzýde Aleksandr Varakın birinshi oryn aldy.
Áıelder arasyndaǵy jarysta da jerlesterimiz aıanyp qalmady. Brass ádisi boıynsha 50 metrdi Adelına Pchelınseva birinshi bolyp júzip ótse, 100 metrge júzýde kúmis medal ıelendi. Taǵy bir otandasymyz Anastasııa Rezvansev 200 metr qashyqtyqta ekinshi boldy.