Kadr rezervine qatysýǵa 1 650 qazaqstandyq ótinim berdi. Eske sala keteıik, atalǵan jobanyń iske qosylǵany týraly «Azamattarǵa arnalǵan úkimet» memlekettik korporasııasy 1 naýryzda jarııalaǵan bolatyn, tilek bildirýshilerdiń 12 kún ishinde jeke derekterin toltyryp, biliktiligi týraly qujattardy tapsyrý múmkindigi boldy.
Testileýdiń birinshi kezeńinen 1 246 adam ótti, úmitkerler logıkalyq testileýdiń 78 suraǵyna jaýap berdi. Kelesi kezeńge saýaldardyń 30%-yna durys jaýap bergen 1 067 úmitker jiberildi.
Jobaǵa tirkelgenderdiń arasynda Nur-Sultan qalasy men Almaty oblysynyń turǵyndary basym (25%-dan astam), eń az ótinim Pavlodar oblysynan kelip túsken. Daryndylar pýlyna qatysýshylardyń 8%-dan astamynyń 10 jyldan astam jumys ótili bar. Irikteýdiń birinshi kezeńinen ótken úmitkerlerdiń qorytyndy tizimi talent.gov4c.kz saıtynda jarııalanǵan.
Testileýdiń ekinshi kezeńinde úmitkerlerdiń Qazaqstan Respýblıkasynyń zańnamasy boıynsha bilimi tekseriledi. Qatysýshylar el Konstıtýsııasy, «Memlekettik qyzmetter týraly», «Derbes derekter týraly», «Sybaılas jemqorlyqqa qarsy is-qımyl týraly», «Jeke jáne zańdy tulǵalardyń ótinishteri týraly» jáne «Aksıonerlik qoǵamdar týraly» zańdar boıynsha 1,5 saǵat ishinde 90 suraqqa jaýap berýi qajet.
Testileýden keıin qorytyndy kezeńge ótken úmitkerler memlekettik jáne qoǵam qaıratkerlerinen, HR-sarapshylardan jáne memlekettik korporasııanyń basqarma múshelerinen turatyn sarapshy keńes múshelerimen áńgimelesýden ótetin bolady. Joǵary ball jınaǵan jáne áńgimelesý kezeńinen sátti ótken úmitkerler keıinnen tıisti bos laýazymdarǵa taǵaıyndaý úshin daryndylar pýlyna qabyldanady.