Elimizdegi alǵashqy meteostansa

Osy saladaǵy eń alǵashqy meteostansa 1848 jyly Syr boıyndaǵy Qazaly qalasynda ashylǵan. Araǵa 6 jyl salyp Semeıde, al 1859 jyly Alma­ty qa­la­syn­da osyndaı ortalyqtar ju­mysyn bas­tapty.

Eń qyzyǵy, Qazalydaǵy meteoro­logııa­lyq stansa 173 jyldan beri úzi­lis­siz jumys istep keledi. 1907-1942 jyldary ortalyqqa Anna Blan de­gen maman basshylyq jasap, ár jyl­dary aǵa gıdromed-baqylaýshy Varvara Mıas­nıkova, tehnık-agrometeorolog Va­len­tına Garına, gıdromed-baqy­laý­shy Antonına Pankıeva, tehnık-gıdrolog Gelsem Iаrseva, gıdropost baqy­laýshysy Aleksandr Ivanovıch Fedo­rovter elge qylaýsyz qyzmet etipti. О́tken ǵasyrdyń 50-90 jyldary ara­ly­ǵynda mekemeni basqarǵandar esimi qur­met­pen atalady.

 Elimiz táýelsizdik alǵan tustary mekeme jańasha jumys yrǵaǵyna kóshti. Sol jyldary jergilikti maman Quttybaı Tarǵynov basqarǵan «Qa­zaly aýa raıyn baqylaý» stansasy úlgili qyzmeti úshin 2005 jyldyń shilde aıynda Jeneva klımat baqylaý ortalyǵynyń Qurmet gramotasyna ıe boldy. Mártebeli marapatqa jetý jolynda stansa qyzmetkerleri I.Arent, T.Sultanmuratov, N.Sultanmu­rato­vanyń qosqan úlesi mol boldy.

Mekemeni 2008-2011 jyldary Qazıhan Serdalıev basqarsa, on jyldan beri Sáýle Ospanova basshylyq jasap keledi. Stansa kesheninde atmosferanyń jáne jerústiniń jaǵdaıyn baqylaýǵa arnalǵan meteorologııalyq alań men baqylaý nátıjelerin alatyn, óńdeıtin jáne beretin aspaptarmen jabdyqtalǵan oryndar bar.

Osy quraldar arqyly mamandar meteorologııalyq qubylystardyń bel­gi­li bir merzim ishinde ózgerýin, aýa­nyń ylǵaldylyǵy men temperatýrasyn, jeldiń baǵyty men jyldamdyǵyn, atmos­fe­ralyq qysymdy, bulttyń pi­shini men sanyn, qardyń kólemin, jaýyn-shashyn mólsheri men sý deńgeıin, maýsymdyq sýdyń temperatýrasyn baqylaıdy. Syr­darııa ózenindegi sýdyń shyǵynyn, qysty kúni muzdyń qalyńdyǵyn, kún shuǵylasynyń uzaqtyǵyn anyqtaıdy. Baqylaý 3 saǵat saıyn júrgizilip turady. Osydan alynǵan málimetter «Qyzylorda gıdrometeorologııalyq ortalyǵyna» jiberiledi.

Metereologter jumysy barlyq sa­­laǵa tikeleı qatysty. Ásirese aýyl sharýa­shy­ly­ǵy, áýe tasymaly eń aldymen osy kún raıyn baǵdarlaıtyndardyń boljamyna júginedi. Sonymen qatar meteorologter málimetiniń tótenshe jaǵdaılardyń aldyn alýda da mańyzy joǵary.

Qyzylorda