Búgin Májilis Spıkeri Nurlan Nyǵmatýlınniń tóraǵalyǵymen Palata Bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy Egemen.kz Májilistiń baspasóz qyzmetine silteme jasap.
Bıýro otyrysynda depýtattar qaraýyna EAEO-nyń tehnıkalyq reglamentterinde talaptar belgilenbegen ónimniń EAEO sheńberindegi aınalysynyń tártibi jáne mundaı ónimniń qaýipsizdigin qamtamasyz etý qaǵıdalary týraly kelisimdi ratıfıkasııalaý týraly zań jobasy usynyldy.
Qujat Odaqtyń tehnıkalyq reglamentteri qabyldanbaǵan nemese kúshine enbegen jáne memleketterdiń zańnamasyna sáıkes mindetti qaýipsizdik talaptary belgilenbegen ónimniń qaýipsizdigin qamtamasyz etedi. Kún tártibiniń jobasynda «Kvazımemlekettik sektordyń jekelegen sýbektileriniń satyp alýy týraly» zań jobasyn jáne oǵan ilespe zań jobalaryn ekinshi oqylymda qaraý usynyldy.
Sonymen qatar otyrysta jetinshi saılanǵan Májilis pen shet el parlamentteri arasyndaǵy yntymaqtastyq jónindegi toptardyń quramy týraly másele qaraldy.