SQO polıseıleri túrli sebeptermen úı ishindegi jandarǵa aıtpaı uzaq merzimge iz-túzsiz ketip qalǵan 91 adamnyń tabylýyna kómektesti, dep habarlaıdy Egemen.kz.
Mysaly, ápkesimen birge turyp kelgen 46 jastaǵy qala turǵyny eki apta boıy úıge kelmegen. Inisin uzaq kútken áıel polısııaǵa júginip, onyń joǵalǵanyn aıtady. Izdestirý jumystary nátıjesinde joǵalǵan er adam ashy sýǵa qumartqandardyń arasynda otyrǵan jerinen tabyldy. «Osyǵan uqsas jaǵdaılar jıi kezdesedi. Buǵan sebep – alkogol. Keıde otbasyndaǵy janjaldyń da sebep bolýy múmkin. Joǵalǵandar jaqyndaryna tis jarmaı, belgisiz baǵytta ketip qalady. Al týystary bolsa - sary ýaıymǵa salynyp, izdeı bastaıdy. Jalpy, oblys turǵyndary jyl basynan beri jaqyndaryn izdep tártip saqshylaryna 91 ret júgindi. Olardyń 86-sy kezekshi táýlikte tabyldy. Al qalǵan jaǵdaılarda izdestirý arqyly», deıdi Petropavl qalasy PB krımınaldyq polısııa bóliminiń bastyǵy polısııa podpolkovnıgi Darhan Zııafeddın.