Dárigerler koronavırýs ınfeksııasynyń taralýyn tejeýdiń bir ǵana jolyn usynyp otyr. Bul – vaksınalaý. Oblystyq densaýlyq saqtaý basqarmasy basshysynyń orynbasary Qaısar Abdalıevtyń málimetinshe, 3 432 adam koronavırýs ınfeksııasyna qarsy «Spýtnık V» vaksınasyn saldyrǵan. Onyń ishinde 1 363 pedagog, medısına salasynyń 1575, memlekettik qyzmettiń 41 ókili bar. Sondaı-aq 453 polıseıdiń vaksına alǵany belgili boldy.
О́ńirdegi koronavırýs ınfeksııasyn juqtyrýshylar kóp tirkeletin oshaqtyń biri – Teńiz ken orny. Birneshe myń adamnyń turaqty jumys ornyna aınalǵan kenishte vaksınalaý qalaı júrip jatyr? Osy saýalǵa jaýap izdegende, aldymen medısına qyzmetkerleriniń densaýlyǵyn qorǵaý úshin taǵy da 210 «Spýtnık V» vaksınasy jetkizilgenin aıtýǵa bolady.
– «Teńizshevroıldyń» 90-nan astam qyzmetkeri vaksına saldyrdy. Qazir «Spýtnık V» vaksınasyn kompanııa men merdiger mekemelerdiń barlyq qyzmetkeri úshin satyp alý múmkindigi qarastyrylyp otyr. Osyǵan oraı «Teńizshevroıl» COVID-19 ınfeksııasynyń odan ári taralaýyna jol bermeý maqsatynda erikti vaksınalaý baǵdarlamasy úshin vaksınalardy satyp alýǵa qatysty Úkimet tarapynan qoldaý kútedi, – deıdi «Teńizshevroıl» JShS-na qarasty medısınalyq klınıkanyń dırektory Abdýlla Iýsýpbekov. – Basty maqsat – Teńizdegi jumysshylar arasynda ujymdyq ımmýnıtetti qalyptastyrý. Vaksınalaý arqyly qaýipti vırýstan qorǵana alamyz. Sonymen birge el ekonomıkasynyń damýyna eleýli úlesin qosyp otyrǵan kompanııa jumysyn sanıtarlyq-epıdemııalyq talaptarǵa saı júzege asyrý úshin memlekettik organdardyń usynystaryn qoldanyp otyrmyz, – deıdi A.Iýsýpbekov.
Ken ornynda koronavırýsqa qarsy vaksına alǵandardyń qatarynda órt jáne apatty joıý qyzmetiniń medısınalyq úılestirýshisi Rýslan Jalǵazın da bar. Ol únemi medısına jańalyqtarynan habardar bolyp otyrady.
– Jalpy vaksınalar, sonyń ishinde «Spýtnık V» ekpesiniń áseri týraly klınıkalyq zertteýlerdi jiti qadaǵalap júrmin. Sondaı zertteýlerdiń qorytyndysy kórsetkendeı, bul vaksınanyń janama áseri joǵyn bildim. Vaksınasyz qaýipti vırýstyń taralýyn tejeý qıyn bolar edi. Sondyqtan atalǵan vaksınanyń eki komponentin aldym. Qazir ózimdi jaqsy sezinýdemin, – deıdi ol.
Atyraý oblysy taǵy da «qyzyl aımaqtyń» «qarmaǵyna» ilindi. Buǵan Naýryz merekesindegi demalys kúnderinde qaýipti vırýsqa shaldyqqandar sanynyń artýy sebep bolyp otyr. Máselen, 26-27 naýryzda 174 adam koronavırýs ınfeksııasyn juqtyrdy.
Oblystyq sanıtarlyq-epıdemııalyq baqylaý departamentiniń málimetinshe, sońǵy úsh táýlikte koronavırýsqa shaldyqqandar sany Atyraý qalasy men Teńiz kenishinde kúrt ósken. Máselen, oblystyq sanıtarlyq-epıdemııalyq baqylaý departamenti baspasóz qyzmetiniń aqparatyna súıensek, 26 naýryzda Atyraý qalasynda 40 adam qaýipti vırýs juqtyryp otyr. Al Teńiz kenishinde – 41 jumysshy, Mahambet aýdanynda – 5, Jylyoıda – 2, Qyzylqoǵada – 2, Isataıda – 2, Inder aýdanynda 1 adam koronavırýs ınfeksııasyna shaldyqqan. Onyń ishinde 35 naýqasta Covid-19-dyń sımptomdy túri anyqtaldy.
«Sońǵy málimetke sáıkes, bul táýlikte koronavırýs ınfeksııasynan 92 adam emdelip shyqty. Qazir 170 adam úı jaǵdaıynda emdelýde. Oblystyq ınfeksııalyq stasıonarda – 8, modýldik stasıonarda – 123, al aýdandardaǵy ınfeksııalyq stasıonarlarda 24 pasıent oqshaýlanǵan. Teńiz kenishindegi ınfeksııalyq stasıonarda 309 adam em qabyldap jatyr» dep habarlady departamenttiń baspasóz qyzmeti.
Mine, bir táýliktiń dereginen-aq munaıly óńirde qaýipti vırýstyń qaýpi áli de seıilmeı, kerisinshe, qaıta óristeı bastaǵany ańǵarylady. Bálkim, buǵan karantındik shekteý sharalarynyń jeńildetilgeni keri áserin tıgizgen sekildi. Osyǵan baılanysty oblystyń bas sanıtar dárigeri Mádenıet Tanaýov karantındik shekteý sharalaryn qaıta kúsheıtetin jańa qaýlyǵa qol qoıdy. Sóıtip, búgin 29 naýryzda saǵat 00.00-de kúshine enetin jańa qaýlyǵa sáıkes, kópshilik is-sharalardy, onyń ishinde úıde jáne jappaı adamdar jınalatyn ózge de is-sharalardy ótkizýge tyıym salynyp otyr.
Atyraý oblysy