Naýryzdyń sońǵy kúnderi dala tósi sál jipsigenimen, qys boıǵy taý-teńiz qasat qardyń murty da buzylǵan joq. Ormandy alqapta aq qar, kók muz siresip jatyr. Osy ýaqytta tebindegi jylqyǵa da, taǵy ańǵa da qaýip kóp.
Oblystyq orman sharýashylyǵy jáne janýarlar álemi aýmaqtyq ınspeksııasynyń málimetinshe, kıik qystap qalǵan Qorǵaljyn men Selınograd aýdandarynyń aýmaǵynan qar ústinde ólip jatqan 34 kıik tabylǵan. Mamandardyń joramaldaýynsha, tisterine tıer talshyq taba almaı, ashtan ólgenge uqsaıdy. Bul pikir qısynǵa ábden keledi. Kıikke talǵajaý eter qara ot joq. Ánsheıinde qar tura qoımaıtyn qyrat-qyrqalar da, yqtasyn bolar saı-sala da qarǵa meltektep tur. «PO Ohotzooprom» respýblıkalyq memlekettik qazynalyq kásipornynyń ortalyq óńirlik fılıaly ınspektorlary Qorǵaljyn aýdanyndaǵy Saýmal kóli mańynan, Selınograd aýdanyndaǵy Aqmol aýyly janynan 20 kıiktiń ólimtigin tapqan. Bul kózge túskeni ǵana. Qaharly qystyń sońynda adam aıaǵy basa bermeıtin kózden tasa, kóńilden jyraq jerde qanshasy opat bolǵanyn eshkim anyq aıta almaıdy.
Osy bir oqys oqıǵaǵa oraı kıikti aman alyp qalý úshin oblystyq mamandandyrylǵan tabıǵatty qorǵaý prokýratýrasy kıik óretin birneshe aýdan ákimderine orman baýyryndaǵy, kıik jaıylatyn óristegi qardy tazalaý jóninde usynys jasady.
Osydan birer kún buryn qar qyspaǵynda qalǵan kıikterdiń eldi mekenderge kirgeni týraly da habar emis-emis estilgen bolatyn. Kókke aýzy jetkenshe kıeli ańǵa qamqorlyq kerek-aq bolyp tur.
Aqmola oblysy