Parlament Senatynyń Bıýro músheleri bıylǵy 1 sáýirde ótetin Palata otyrysynyń kún tártibin bekitti, dep habarlady Senattyń baspasóz qyzmeti.
Depýtattar TMD-ǵa qatysýshy memleketterdiń bas bostandyǵynan aıyrýmen baılanysty emes jazalardy oryndaýdy berý týraly konvensııany ratıfıkasııalaýdy qaraıtyn boldy.
Memleketaralyq standarttaý jónindegi qujattardy taratý týraly kelisimdi ratıfıkasııalaý týraly zań jobasy da otyrystyń kún tártibine engizildi. Ony qabyldaý memleketaralyq standarttaý jónindegi qujattardy taratýdyń biryńǵaı erejeleri men rásimderin bekitýge múmkindik beredi.
Senat otyrysynda «Eýrazııalyq ekonomıkalyq odaq sheńberinde baǵaly metaldarmen jáne asyl tastarmen operasııalardy júzege asyrý erekshelikteri týraly kelisimdi ratıfıkasııalaý týraly» zań jobasy da talqylanady. EAEO aýmaǵynda baǵaly metaldar men asyl tastardyń erkin aınalymyn qamtamasyz etý úshin jaǵdaı jasaý osy jumystyń nátıjesi bolady.