Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda kóktemgi egis jumystaryna daıyndyq barysy qaraldy, dep habarlaıdy Egemen.kz QR Premer-Mınıstriniń Baspasóz qyzmetine silteme jasap.
Sharýalardyń egis naýqanyna daıyndyǵy týraly aýyl sharýashylyǵy mınıstri Saparhan Omarov, janar-jaǵarmaı materıaldarymen qamtamasyz etilýi týraly energetıka mınıstri Nurlan Noǵaev, óńirlerdegi ahýal týraly Túrkistan oblysynyń ákimi О́mirzaq Shókeev, Qostanaı oblysynyń ákimi Arhımed Muhambetov, Soltústik Qazaqstan oblysynyń ákimi Qumar Aqsaqalov, Aqmola oblysynyń ákimi Ermek Marjyqpaev baıandady.
Bıyl 22,7 mln ga jerge egin egý josparlanǵan, bul 2020 jylǵa qaraǵanda 186,6 myń ga artyq. Dándi daqyldar men dándi burshaqty daqyldar 15,8 mln ga (onyń ishinde bıdaı – 12,1 mln ga), maıly daqyldar – 3 mln ga, maqta – 116,5 myń ga, qant qyzylshasy – 21,8 myń ga, kókónis jáne kartop – 489 myń ga, jemshóp daqyldary 3,4 mln ga jerge egiledi.
Kóktemgi dala jumystaryn júrgizý úshin 380 myń tonna dızel otynyna qajettilik anyqtaldy. Aýyl sharýashylyǵy taýarlaryn óndirýshiler úshin onyń ortasha baǵasy shamamen lıtrine 165 teńgeni quraıdy.
Elimizde 141,7 myń traktor, 73,2 myń tuqym sepkish, 221,2 myń topyraq óńdeý quraly, 4,3 myń egis kesheni bar. 2021 jylǵy 29 naýryzdaǵy jaǵdaı boıynsha aýyl sharýashylyǵy tehnıkasynyń kóktemgi egis jumystaryn júrgizýge daıyndyǵy 97% quraıdy.
Agroónerkásiptik keshen sýbektilerin qoldaý úshin «Agrarlyq nesıe korporasııasy» AQ respýblıkalyq bıýdjetten 70 mlrd teńge kóleminde bıýdjettik kredıt bóldi. Túpki qaryz alýshylar úshin syıaqy mólsherlemesiniń jylyna 5%-dan aspaıdy. Bólingen qarajat 3 mln ga egis alqabyn qamtı otyryp, 2400 AО́K sýbektisin qarjylandyrýǵa múmkindik beredi.
Bıýdjettik kredıt berýmen qatar, bıylǵy jyly aýyl sharýashylyǵy ónimderin forvardtyq satyp alýdy júzege asyrý úshin bólingen qarajattyń kólemi 24,5 mlrd teńgeden 45,3 mlrd teńgege deıin artty.
«Kóktemgi egis jumystaryn sapaly ári ýaqtyly júrgizý eldiń azyq-túlik qaýipsizdigin qamtamasyz etýdiń mańyzdy faktorlarynyń biri. Byltyr pandemııaǵa qaramastan egis jumystary óte joǵary deńgeıde júrgizildi. Agrotehnologııalar dál saqtalyp, tyńaıtqyshtar men ósimdikterdi qorǵaý quraldary ýaqtyly salyndy. Bul mol astyq jınaýǵa múmkindik berdi. Bıylǵy jyly Úkimet kóktemgi egisti qarjylaı jáne materıaldyq-tehnıkalyq qamtamasyz etý boıynsha barlyq qajetti sheshimderdi qabyldady», dedi A. Mamın.
Premer-Mınıstr Ekologııa mınıstrligine Aýyl sharýashylyǵy mınıstrligimen jáne ákimdiktermen birlesip, respýblıkanyń ońtústik óńirlerindegi aýyl sharýashylyǵy ónimin óndirýshilerdi sýarmaly sýmen, onyń ishinde uzaq merzimdi perspektıvada turaqty qamtamasyz etý boıynsha sharalar qabyldaýdy tapsyrdy.
О́ńirlerdiń ákimderine aýyl sharýashylyǵy ónimin óndirýshiler úshin tizbeler men sýbsıdııalar normalaryn bekitý jumysyn bir apta ishinde aıaqtaý, Energetıka mınıstrligine bekitilgen keste men baǵalar boıynsha egis jumystaryn júrgizý úshin dızel otynynyń qajetti kólemin jetkizýdi qamtamasyz etý tapsyryldy.
«Aýyl sharýashylyǵy mınıstrligi oblystardyń ákimdikterimen birlesip, egis alańdaryna júrgizilip jatqan ártaraptandyrý sheńberinde áleýmettik mańyzy bar azyq-túlik taýarlaryn óndirý kólemin arttyrýǵa erekshe nazar aýdarsyn», dedi A. Mamın.