Kentaý qalasynyń polıseıleri mal urlyǵymen aınalysqan qylmystyq topty ustady, dep habarlaıdy Polisia.kz.
Kentaý qalasynyń polısııasyna jaqyn mańdaǵy aýyldardyń turǵyndary mal urlyǵynyń qurbany bolǵany boıynsha aryzdanady. Jábirlenýshilerdiń biriniń aıtýynsha, belgisiz adamdar jaıylymnan onyń bes bas sıyryn urlap ketken, al basqa aýyl turǵyny bolsa, jylqysynyń urlanǵanyn jetkizgen. Atalǵan jaıttardy polısııa qyzmetkerleri SDTBT-ǵa “Mal urlyǵy” baby boıynsha tirkedi, eki jaǵdaıda keltirilgen shyǵyn shamamen eki mıllıon teńgeni qurady. Jedel-izdestirý is-sharalarynyń nátıjesinde Túrkistan oblysy PD Krımınaldyq polısııa qyzmetkerleri Kentaý QPB-nyń qyzmetkerlerimen birlese otyryp, tórt kúdiktini ustady. Olar Túrkistan jáne Kentaý qalalarynyń turǵyndary bolyp shyqty. Kúdiktiniń bireýi buryn mal urlaǵany úshin sotty bolǵan. Belgili bolǵandaı, jas jigitter kóbinese qaraýsyz qaldyrylǵan maldardy erkin jaıylymdardan nemese sharýashylyq aýlalarynan urlap ketken. Sodan keıin urylar, urlanǵan maldy “Gazel” avtokóligine tıep, qylmys ornynan jasyrynyp otyrǵan. Urlanǵan maldardy Tólebı aýdany aýmaǵynda satyp, aqshasyn óz qajettilikterine jumsaǵan.
Búgingi tańda tergeý kúdiktilerdiń mal urlyǵynyń bes jaıtyna qatysy bar ekenin anyqtady, olardyń tórteýi 2019 jyly jasalsa, bir derek 2021 oryn alǵan. Jalpy kúdiktiler aýyl turǵyndarynan 16 bas iri qara men bir jylqyny jymqyrǵan. Keltirilgen shyǵynnyń jalpy kólemi alty mıllıon teńgeden asty. Polısııa urlanǵan jylqyny tárkilep alyp, zańdy ıesine qaıtaryp berdi. Tergeý jalǵasýda. Oqıǵanyń mán-jaıy jáne kúdiktilerdiń basqa da osyǵan uqsas mal urlyǵyna qatysy bar-joǵy anyqtalýda.
Mal urlyǵyn boldyrmaý úshin Túrkistan oblysynyń polıseıleri azamattarǵa tórt-túlikti jaıylymdarda jáne qora-jaılarynda qaraýsyz qaldyrmaýǵa keńes beredi. Maldy erkin jaıý úshin baqtashy jaldaý kerek, al aýlalar men qoralardy senimdi qorshaýmen nyǵaıtý qajet. Sondaı-aq, maldy tańbalaýdy umytpańyzdar. Eger, sizde, mal joǵalsa nemese urlyqtyń qurbany bolsańyz, tez arada polısııanyń “102” nómirine habarlasyńyzdar.