1-3 sáýir aralyǵynda Túrkııanyń Antalıa qalasynda dzıýdoshylardyń kezekti Grand Slam týrnıri ótedi. Bul jarysta Qazaqstannyń 14 balýany baq synaıdy.
Bul joly biz biraz ýaqyttan beri kórermender nazarynan tys qalǵan Otgonseseg Galbadrahtyń ónerin tamashalaımyz. Asa jeńil salmaqta beldesetin 29 jastaǵy áıgili dzıýdoshymyz 2016 jyly Rıo Olımpıadasynda qola medaldi ıelense, 2017 jáne 2018 jyldary uıymdastyrylǵan álem chempıonattarynda da sol nátıjesin qaıtalady. Qurlyq chempıony atanyp, Azııa oıyndary men Dúnıejúzilik Ýnıversıadada júldegerler qatarynan kóringen Otgonseseg jaraqatyna baılanysty bir jylǵa jýyq ýaqyt boıy tatamı shyqqan joq edi. Endi biz aıtýly dzıýdoshy aldaǵy jarystarda jarqyn jeńisterimen óz jankúıerlerin qýantady dep úmittenemiz. Galbadrahtan bólek, qyzdar arasyndaǵy týrnırde Sevara Nyshanbaeva (57 kılo) men Zarına Sháripova (63 kılo) sheberlik baıqasady.
Al erler básekesinde Maǵjan Shamshadın (60 kılo), Baýyrjan Saǵynǵalıuly (66 kılo), Ańsarbek Ǵaınýllın men Janbolat Baǵytbergenov (73 kılo), Mádı Amangeldi men Abylaıhan Jubanazar (81 kılo), Asylan Saǵıtbek pen Ersultan Muzafarov (90 kılo), Aıbek Serikbaev (100 kılo) jáne Elaman Erǵalıev pen Ádil Orazbaev (+100 kılo) syndy saıypqyrandar saıysqa túsedi.