Túrkııanyń Antalıa qalasynda dzıýdodan Grand Slam týrnıri bastaldy. Bul jarysta Qazaqstannyń 14 balýany baq synap jatyr, dep habarlaıdy Egemen.kz
Jarystyń alǵashqy kúni jerlesterimiz óz jankúıerlerin qýanta almady. 60 kılo salmaqta beldesken Maǵjan Shamshadın tusaýkeser kezdesýinde ıtalııalyq Andere Karlınony qapy qaldyrǵanymen, ekinshi aınalymda brazılııalyq Erık Takabatakege ese jiberdi. Asa jeńil salmaqta belgııalyq Iorre Ferstretenge teń keler eshkim tabylmady. Fınalda ol fransııalyq Valıd Hıardan aılasyn asyrdy. Taıpeılik Iаng Iýng Veı men fransııalyq Romarık Boýda úshinshi oryndy ıelendi.
66 kılo salmaqtaǵy Baýyrjan Saǵynǵalıuly da ekinshi aınalymnan asa almady. Bastapqyda fılıppındik Shýgen Nakanony utqan ol kóp uzamaı Japonııanyń juldyzy Hıfýmı Abege jol berdi. Dál sol Abe jarys jeńimpazy atansa, ıspanııalyq Alberto Martın Gaıtero kúmis medaldi moınyna ildi. Qola júlde ázirbaıjandyq Nıjat Shıhalızade men reseılik Murat Shopanovqa buıyrdy.