Qostanaıdaǵy Abaı dańǵylynyń boıynda ornalasqan toǵyz qabatty turǵyn úıden órt shyqany týraly sýyt habar qalalyq órt sóndirý qyzmetine 2 sáýir kúni tańǵy saǵat 4:42-de kelip túsken. Dereý dabyl soǵylyp, 6 arnaıy tehnıkaǵa mingesken 27 qutqarýshy oqıǵa ornyna attanady, dep habarlaıdy Egemen.kz
«Qutqarýshylar 7-shi qabattaǵy 16 sharshy metrlik qoımada turmystyq kerek-jaraq buıymdary men jıhaz órtenip jatqanyn anyqtady. Kireberisti alyp ketken qoıý tútinnen qoryqqan turǵyndar dúrbeleń týdyra bastady. О́rt tutanǵanda eldiń kóbi tańǵy uıqyda jatqan bolatyn. Turǵyndardy oıatyp, syrtqa shyǵarýǵa týra keldi. TJD kúshimen kópqabatty úıdiń kireberisinen 62 adam evakýasııalandy, 5 adam qutqaryldy. Onyń ishinde 3 bala jáne 2 múmkindigi shekteýli adam bar. Osylaısha, órt sóndirýshilerdiń jedel áreketiniń nátıjesinde qyzyl jalyn der kezinde sóndirildi. Qaza bolǵandar men zardap shekkender joq. О́rttiń shyǵý sebebi men kelgen shyǵyn anyqtalyp jatyr», dep málimdedi oblystyq TJD baspasóz qyzmeti.