«Jan-Saıa» Daǵdarys ortalyǵy jáne qalanyń Áleýmettik ál-aýqat basqarmasy birlesip uıymdastyrǵan «Beıbit áleminiń balalary beıbitshilikti beıneleıdi» beıneleý óneri baıqaýy máresine jetti, dep habarlaıdy Egemen.kz
Jas urpaqtyń boıynda meıirimdilik, qurmet, moral, toleranttylyq, jaýapkershilik syndy qasıetterdi tárbıelep, jalpy adamdyq jáne otbasylyq qundylyqtardy darytý arqyly otbasyndaǵy minez-qulyq mádenıetin, qoǵamdaǵy zorlyq-zombylyqsyz qarym-qatynas ustanymdaryn damytýǵa baǵyttalǵan baıqaýǵa 7-18 jas aralyǵyndaǵy almatylyqtar qatysty.
«Beıbit áleminiń balalary beıbitshilikti beıneleıdi» baıqaýyna Almaty qalasy boıynsha 60 shaqty bilim berý mekemesinen 266 shákirt óz jumysyn usyndy. Onyń ishinde mamandandyrylǵan mektepter men beıneleý óneri stýdııalary da bar. Shart boıynsha ár qatysýshy tek bir sýretten ótkizip, olar otbasylyq qundylyqtardy jáne urpaqtar sabaqtastyǵyn; salaýatty otbasyn qurýdy, balalardy týý men tárbıeleýdi nasıhattaý; qurbylar arasyndaǵy qarym-qatynas máselesine nazar aýdarý; balalardyń nazaryn qorshaǵan ortany jáne jan-janýarlar álemin qorǵaý máselerine aýdarý, týǵan jerine, tabıǵatqa degen súıispenshiligin qalyptastyrý taqyryptaryn qamtýy tıis bolatyn.
Ádilqazylar alqasynyń quramynda «Bambonya» balalar shyǵarmashylyq damý ortalyǵynyń atqarýshy dırektory E.Kýrmanbekova-Lakota, «Daǵdarys Ortalyqtarynyń Odaǵy» ZTB atqarýshy dırektory A.Medeýova, QazBSQA janyndaǵy lıseıiniń muǵalimi G.Baıasılova, sýretshi, dızaıner A.Mılovanova, telejúrgizýshi, «Zerde» art terapııasynyń avtory M.Saparbaev, taǵy basqalar bar.
Baıqaý nátıjesi boıynsha 3 júldeli oryn taǵaıyndalyp, 11 atalym anyqtaldy. Olardyń qatarynda «Kásibı jáne estetıkalyq qabyldaý úshin» atalymy Veronıka Serebrıannıkovanyń «Bizdiń dostyq álemimiz» sýretine berildi (17 jasta, jetekshisi: Popova T.O.). «Avtorlyq ıdeıanyń ózindik ereksheligi úshin» atalymynda Ryjova Mılananyń «Meıirimdilik álemdi qutqarady» sýreti úzdik dep tanyldy (12 jasta, jetekshisi: Kenjebıke Shalǵymbaıqyzy). «Emosıonaldylyq úshin» atalymy Vasıleva Margarıtanyń «Kópten kútken kún» sýretine (11 jas), «Ideıanyń kreatıvligi úshin» atalymy Beleskaıa Sofıanyń «Álemdi saqtaıyq» sýretine (11 jasta, jetekshisi: Lada Gaınovıch), «Oryndaý utqyrlyǵy men sheberligi úshin» atalymy Nurǵalym Alýanyń «Esińde me?» sýretine (13 jasta), «Tujyrymdamanyń ereksheligi jáne kórkemdik mánerliligi úshin» atalymy Agata Tretıakovtyń «Otbasy qundylyqtary» sýretine (14 jasta), «Qyzyqty grafıkalyq tehnıka úshin» atalymy Denı Mazıevtiń «Meniń qalamdaǵy kúz» sýretine (8 jasta, jetekshisi: Bodryh I.A.), «Mazmundyq mánerliligi úshin» atalymy Valentına Tanasevıchtiń «Otbasy – tirek» sýretine (12 jasta), «Beıneligi jáne shyǵarmashylyq kózqarasy úshin» atalymy Toqmýrzıeva Qalamqastyń «Jer ómiri» sýretine (10 jasta, jetekshisi: Kııanova I.V.) berildi. Al «Tústerdiń ashyqtyǵy men qyzyqty tehnıkalyq sheshimi úshin» atalymy Krıstına Pasenkonyń «Qas qaǵym sátterdi eske túsirý» sýretine (14jasta), «Shyǵarmashylyq kózqarasy jáne sheshimniń ereksheligi úshin» atalymy Gırdzııaýskas Karınanyń «Barlyǵy mahabbattan bastaý alady» sýretine berildi (14 jasta, jetekshisi: Popova T.O). Al 3-orynǵa 9jastaǵy Manko Alen «Ájege degen mahabbat» sýreti úshin, (jetekshisi: Faızýlla Anel), 2-oryndy «Baqytty balalyq shaq» sýretimen 13 jasar Kádirbaı Dıdar, al 1-oryndy 15 jastaǵy Anastasııa Krýchına «Otbasy kúshi» sýreti úshin ıelendi.
Jeńimpazdardy marapattaý keıinge shegerilgen. Jeńimpazdarynyń syılyqtary «Daǵdarys Ortalyqtarynyń Odaǵy» ZTB atynan úlestiriletin bolady.