Alla qalasa, endi az kúnnen keıin musylmandar úshin qasıetti sanalǵan Ramazan aıynyń 30 kún orazasy bastalady. Bul ýaqyt – tańnan qara keshke deıin nár tatpaı, jamandyqtan boıyńdy aýlaq ustap, jannyń da, tánniń de rýhanı tazaratyn kezi.
Din mamandary Ramazan aıyna asa uqyptylyqpen qarap, úlken daıyndyqpen kelý kerek ekendigin aıtady. Al biz 30 kún orazaǵa daıynbyz ba? Qalaı daıyn bolýymyz kerek? Bul týraly elordadaǵy respýblıkalyq Áziret Sultan meshitiniń naıb ımamy Baqytjan О́tkelbaev túsindirip berdi.
«Paıǵambarymyzdyń (s.ǵ.s.) «Iá, Rabbym, bizge Erejep pen Shaǵban aılaryn berekeli ete gór. Bizdi Ramazan aıyna aman-esen jetkize gór» degen duǵasy bar. Bul eki aı – Ramazan aıyna deıingi daıyndyq aılar. Ramazan aıynda birden taǵamnan tyıylý adam aǵzasyna da, nápsisine de aýyr soǵýy múmkin. Sondyqtan aldyńǵy eki aıda múmkindiginshe jıi nápil orazalar ustap, qulshylyqty arttyrǵan abzal. Zamanynda paıǵambarymyz (s.ǵ.s.) osy aılarda óte jıi oraza ustap, qulshylyǵyn kóbeıtken eken. Biz de Ramazanǵa deıingi Erejep pen Shaǵban aılarynda kúnimizdi orazamen, túnimizdi qulshylyqpen ótkizsek, saýaby kóbirek bolady. Bul paryz emes nápil bolǵandyqtan, bul eki aıda oraza ustaý mindetti emes, biraq ustaǵan saýap bolady. Degenmen, rýhanı tazaryp, Ramazan aıyna daıyndyqpen kelgen kisige orazada kóp jeńil bolady. Imamdardyń «Ramazan aıyna daıyndalý kerek» deıtinderi osy», deıdi ımam.